पतीच्या प्रेयसीचा पत्नीकडून खून

वास्को, दि. २४ (प्रतिनिधी): वास्को येथे एका नामांकित इस्पितळात उपचार घेत असलेल्या माधवी या कुळे येथील महिलेचा आज ललिता नेपाळी या महिलेने सुऱ्याने भोसकून खून केला. आपल्या पतीचे माधवी हिच्याशी अनैतिक संबंध असल्याच्या संशयावरून ललिता हिने हा खून केला.
माधवी जी. देवन्नावर हिला २२ एप्रिल रोजी वास्कोच्या एका खाजगी इस्पितळात उपचारासाठी दाखल करण्यात आले होते. आज संध्याकाळी ५.३० वाजण्याच्या सुमारास तिला भेटण्यासाठी ललिता (३३) इस्पितळात आली. त्या दोघींत काही वेळ बाचाबाची झाल्यानंतर ललिता हिने आपल्याजवळील पिशवीतून सुरा काढून माधवीवर सपासप वार केले व नंतर स्वतःच्या हातावरही वार केले. या घटनेची माहिती मिळताच इस्पितळातील डॉक्टर्सनी धाव घेऊन माधवीला तातडीने अतिदक्षता विभागात हलविले व उपचार सुरु केले, तथापि माधवीने प्राण सोडला. पोलिसांनी पंचनामा करुन ललिताला ताब्यात घेतले. तिच्यावर सध्या याच इस्पितळात उपचार सुरू असल्याची माहिती पोलिस उपनिरीक्षक संजय दळवी यांनी दिली.
माधवी ही मूळ हुबळी येथील असून, ती काही वर्षे फोंडा येथे वास्तव्य करून होती. ललिता ही मूळ गोमंतकीय असून तिचा विवाह नेपाळी नागरिकाशी झाला होता. तो वास्को येथे स्वयंपाकी म्हणून काम करतो.
इस्पितळात घुसून ज्या प्रकारे एका महिलेने दुसऱ्या महिलेचा खून केला, त्यामुळे या परिसरात खळबळ माजली आहे. पोलिसांनी ललिता हिच्याकडून सुरा जप्त केला आहे. तिने इस्पितळात येतेवेळी तो आणला होता, असे स्पष्ट झाले आहे. पोलिस निरीक्षक उत्तम राऊत देसाई यांच्या मार्गदर्शनाखाली उपनिरीक्षक संजय देसाई तपास करीत आहेत.