परवान्याचे नूतनीकरण नाही, पण खाण सुरूच

बेतुल बॉक्साइट खाणीबाबत सरकारचा अजब खुलासा
पणजी, दि. 19(प्रतिनिधी) - केपे तालुक्यातील बेतुल येथे मे. शक्ती बॉक्साईट खाणीला स्थानिक लोकांचा विरोध असूनही तिथे खाण सुरू असल्याचे मुख्यमंत्री तथा खाणमंत्री दिगंबर कामत यांनी मान्य केले आहे.
याप्रकरणी केप्याचे आमदार चंद्रकांत ऊर्फ बाबू कवळेकर यांनी विचारलेल्या प्रश्नाच्या लेखी उत्तरात मुख्यमंत्र्यांनी हा खुलासा केला आहे. खाण कंपनीचा परवान्याचे नूतनीकरणही करण्यात आले नाही, असेही मान्य करण्यात आले आहे. विशेष म्हणजे या खाणीचा परवाना गेल्या 12 डिसेंबर 1998 साली संपल्याचेही खात्यानेच मान्य केले आहे. दरम्यान, सदर खाणीचे मालक प्रवीणकुमार गोसालिया यांनी 5 ऑगस्ट 1997 रोजी खाण परवाना नूतनीकरणासाठी अर्ज सादर केला होता. नूतनीकरण अर्जावर राज्य सरकार जोपर्यंत आदेश देत नाही तोपर्यंत खाण परवाना सुरू असल्याचे गृहीत धरण्याची तरतूद कायद्यात आहे,असे सांगण्यात आले आहे.
खाणमंत्र्यांनी केलेल्या या खुलाशावरून राज्य सरकारकडून खाण मालकांवर मेहेरनजर केली जात असल्याचे उघडकीस आले आहे. स्थानिक लोक या खाणीविरोधात आंदोलन करीत असताना त्यांच्या मागणीची दखल न घेता खाण मालकाला रान मोकळे करून देण्याचा हा प्रकार असल्याची प्रतिक्रिया येथील स्थानिकांनी व्यक्त केली आहे.
या कंपनीला केंद्रीय पर्यावरण व वन मंत्रालयातर्फे सशर्त पर्यावरण परवाना दिला आहे. परंतु या परवान्यात मंत्रालयाने घालून दिलेल्या एकाही अटीची पूर्तता कंपनीकडून केली जात नसल्याचा आरोप स्थानिकांनी केला आहे. 1998 साली परवाना संपलेल्या कंपनीचे 2008 उजाडूनही नूतनीकरण होत नाही व प्रत्यक्षात खाण सुरू आहे, हा प्रकारच मुळी सरकारकडून बेकायदा खाण उद्योगाला दिल्या जाणाऱ्या आशीर्वादाचे उदाहरण असल्याचे सांगितले जात आहे.