वॉर्नकडून मैदानातच धूम्रपान

माफीसंबंधी "नोट'चे "आयपीएल' ला पत्र
पणजी, दि. 23 (प्रतिनिधी) - फिरकीचा जादूगार म्हणून ओळखला जाणारा ऑस्ट्रेलियाचा गोलंदाज शेन वॉर्न हा "आयपीएल'मधील सामना सुरू असताना मैदानावर धूम्रपान करीत असल्याचे छायाचित्र 21 मे रोजी "हिंदुस्थान टाइम्स' दैनिकात प्रसिद्ध झाले आहे. त्याची गंभीर दखल राष्ट्रीय तंबाखू निवारण संघटनेने ("नोट') घेतली आहे.
सध्या सुरू असलेल्या भारतीय प्रामियर लीगच्या 20-20 स्पर्धेत राजस्थान रॉयल्स संघाचे नेतृत्व करणाऱ्या वॉर्नच्या या कृतीबाबत "नोट' चे सरचिटणीस डॉ. शेखर साळकर यांनी "आयपीएल'चे आयुक्त ललित मोदी यांना पत्र पाठवले आहे. वॉर्नने याप्रकरणी प्रेक्षकांची माफी मागावी, अशी मागणी "नोट'ने या पत्राद्वारे केली आहे. ऑस्ट्रेलियात असा कायदा असता व त्याचे उल्लंघन झाले असते तर त्यांच्यावर कारवाई झालीच असती. भारतातही व्यक्तीपेक्षा कायदा श्रेष्ठ आहे, असा संदेश सर्वत्र पोहोचण्याची गरज आहे, असे डॉ.साळकर यांनी आज घेतलेल्या पत्रकार परिषदेत सांगितले.
राजस्थान रॉयल्स संघात गोव्याचा "लिटल मास्टर' स्वप्निल अस्नोडकर खेळत आहे. वॉर्न हा महान खेळाडू असून अनेकजण त्याला "आदर्श' मानतात. उद्या त्याच्या या अशा वागणुकीचा परिणाम नव्या खेळाडूंवर पडून स्वप्निलसारखा युवा खेळाडू हातात सिगरेट घेऊन मैदानावर दिसू लागला तर काय होईल, असा सवाल त्यांनी केला. निदान क्रीडा क्षेत्रात तरी सिगरेट किंवा तंबाखूसारख्या पदार्थांना शिरकाव करण्यास वाव असू नये, अशी अपेक्षा डॉ.साळकर यांनी व्यक्त केली.
वॉर्नच्या कृतीबाबत आंतरराष्ट्रीय क्रिकेट मंडळ व क्रिकेट ऑस्ट्रेलियालाही कळवले जाणार आहे, असे त्यांनी नमूद केले. अनेकांसाठी प्रेरणास्थान असलेल्या या व्यक्तींच्या अशा वागणुकीचा युवा पिढीवर काय परिणाम होईल किंवा त्यांच्याकडून कोणता बोध घेतला जाईल, याचा बारीक विचार व्हायला हवा असे डॉ. साळकर म्हणाले. "आयपीएल' मध्ये "उत्तेजक चाचणी (डोपिंग टेस्ट) घेण्याचा निर्णय स्वागतार्ह आहे. मात्र आयोजकांनीही वॉर्नची चौकशी करावी. ललित मोदी यांनी क्रिकेट व एकूणच क्रीडा क्षेत्राच्या उज्ज्वल भवितव्यासाठी अशा गोष्टींना थारा देऊ नये, असे आवाहन डॉ. साळकर यांनी पत्राद्वारे केले आहे.
शाहरूखकडून गुन्ह्याची पुनर्रावृती
दरम्यान, प्रसिद्ध अभिनेता शाहरूख खान हा "आयपीएल' च्या कोलकाता रायडर्सचा मालक असून मुंबई इंडियन्सविरुद्ध सुरू असलेल्या सामन्यावेळी पराजय जवळ आल्याने नाराज झालेला शाहरूख सिगरेट ओढत असल्याचे छायाचित्र "मिरर' वृत्तपत्राने प्रसिद्ध केले आहे. सार्वजनिक ठिकाणी धूम्रपान करण्यास कायद्याने बंदी असूनही त्याची पर्वा करीत नसलेल्या शाहरूखला एकदा "नोट' ने नोटीस पाठवली आहे. मात्र त्याचीच पुनरावृत्ती त्याने केल्यामुळे
डॉ.साळकर यांनी तीव्र नाराजी व्यक्त केली. याप्रकरणी आता शाहरूख विरोधात खटला दाखल करण्याची तयारी "नोट' ने सुरू केली आहे, असे ते म्हणाले. अशाच प्रकरणात अमिताभ बच्चन यांच्याविरोधातील खटला सुरू असल्याची माहितीही त्यांनी दिली.