'संकल्प'चे जलावतरण भारत-पाक संबंधांत सुधारणा : अँटनी

वास्को, दि. २०,(प्रतिनिधी) : भारत व पाकिस्तान यांच्यातील संबंध सुधारत चालले असून त्याचा फायदा दोन्ही देशांना होऊ शकतो, असे प्रतिपादन संरक्षणमंत्री ए. के. अँटनी यांनी आज येथे केले. गोवा शिपयार्डने भारतीय किनारारक्षक दलासाठी (कोस्ट गार्ड) बांधलेल्या "संकल्प' या आधुनिक गस्तीनौकेचे अनावरण श्री. अँटनी यांच्या हस्ते झाले. त्यानंतर येथे ते एका पत्रकार परिषदेत बोलत होते.
ते म्हणाले, भारताशी सौहार्दाचे संबंध ठेवण्यातच स्वतःचे हित असल्याची जाणीव पाकिस्तानला होऊ लागली आहे. त्यामुळेच उभय देशांतील राजकीय संबंध सुधारत आहेत. भविष्यात ते आणखी वेगाने सुधारतील असा विश्वास आपणाला वाटतो.
किनारारक्षक दलासाठी बनवण्यात आलेली ही पाचवी गस्तीनौका आहे. किनारारक्षक दलातील ती ६३ वी नौका ठरली आहे.
आज संध्याकाळी मुरगाव पोर्ट ट्रस्टच्या धक्का क्रमांक १० वर "संकल्प'चे अनावरण पार पडले. याप्रसंगी अँटनी यांच्यासह, सभापती प्रतापसिंह राणे, महसूलमंत्री जुझे फिलिप डिसोझा, गोवा शिपयार्डचे अध्यक्ष तथा व्यवस्थापकीय संचालक ए. के. हुंडा, गोवा प्रदूषण खात्याचे संचालक डॉ. यू. एल. जोशी, किनारारक्षक दलाचे महासंचालक आर. एफ. कॉंट्रॅक्टर, गोवा नौदल विभागाचे ध्वाजाधिकारी संजय वडगावकर व इतर मान्यवर उपस्थित होते. अँटनी यांनी, ही अत्याधुनिक गस्तीनौका किनारारक्षक दलासाठी बनवून दिल्याबद्दल गोवा शिपयार्डचे अभिनंदन केले. अशा स्वरूपाच्या १०० हून अधिक गस्तीनौकांची देशाला गरज असून त्या शिपयार्डनेच बनविल्या पाहिजेत. असे ते म्हणाले, या नौकेचे मुख्य अधिकारी म्हणून नियुक्ती झालेल्या कुलदीप सिंग यांना श्री. अँटनी यांच्या हस्ते भेटवस्तू प्रदान करण्यात आली.
एक हेलिकॉप्टर, ५ स्पीडबोट, जहाजभेदी दोन तोफा आदी साधनांनी "संकल्प' सुसज्ज आहे. शत्रूच्या हालचाली, दहशतवादी व तस्करी यांच्यावर चोख नजर ठेवण्यासाठी ही नौका अत्यंत उपयुक्त आहे. इतर जहाजांना आपत्तीवेळी मदत करण्यासाठी ती फायदेशीर ठरणार आहे. समुद्रात एखाद्या जहाजाला आग लागल्यावर अग्निशामक म्हणूनही "संकल्प' प्रभावीरीत्या काम करू शकते. सागरी प्रदूषण रोखण्याची व्यवस्था "संकल्प' नौकेत करण्यात आली आहे. बुडत असलेल्यांना जीवदान देणे, मच्छिमारांना खोल समुद्रात संकटात मार्गदर्शन देणे याचबरोबर युद्धनौका म्हणून "संकल्प' अतिशय उपयुक्त आहे.
श्री. हंडा यांनी सांगितले की, किनारारक्षक दलाच्या ताफ्यात देण्यात आलेली "संकल्प' ही गस्तीनौका आजपर्यंतची सर्वात मोठी नौका आहे. १७ जुलै २००० रोजी गोवा शिपयार्ड ने या नौकेच्या बांधणीला सुुरवात केली होती.