"इएसआय' इस्पितळाचा दर्जा उंचावण्यासाठी ४४ कोटी मंजूर

पणजी, दि. १९ (प्रतिनिधी) - केंद्र सरकारने मडगावातील कर्मचारी राज्य विमा महामंडळाच्या "इएसआय' इस्पितळाचा दर्जा सुधारण्यासाठी ४४ कोटींचा निधी मंजूर केला असून केंद्राच्या या निर्णयामुळे लवकरच या इस्पितळाला नवसंजीवनी प्राप्त होणार आहे.
गोव्यात कर्मचारी राज्य विमा महामंडळाचे वेगवेगळ्या ठिकाणी दवाखाने असून मडगावात एक इस्पितळही आहे. तथापि, अद्ययावत सेवांअभावी या इस्पितळात उपचारासाठी जाणाऱ्या कर्मचाऱ्यांची संख्या गेल्या काही वर्षांत बेताचीच राहिली आहे. किंबहुना ती फारच रोडावली होती असे म्हटल्यास वावगे ठरणार नाही. केंद्राने मंजूर केलेल्या अर्थसाह्यामुळे हे इस्पितळ आता सर्व सुविधांनी सुसज्ज बनेल.
केंद्रीय मजूर मंत्री ऑस्कर फर्नांडीस यांनी गोवा सरकारला निधीच्या मंजुरीबाबत माहिती दिली असून लवकरच या इस्पितळाचा दर्जा सुधारण्याचे काम हातात घेतले जाईल. केंद्र सरकारने शिक्षण व आरोग्य क्षेत्रावर अधिक लक्ष केंद्रित केले असून या इस्पितळाचा दर्जा सुधारण्याची मागणी गेली काही वर्षे सातत्याने होत होती. विविध कर्मचाऱ्यांच्या वेतनात कर्मचारी राज्य विम्यासाठी रक्कम कापली जात असली तरी अद्ययावत सेवासुविधांच्या अभावी त्यांना खाजगी किंवा बांबोळी येथील गोवा वैद्यकीय महाविद्यालयाच्या इस्पितळात उपचारासाठी धाव घ्यावी लागत होती.
पुढील वर्ष ते दीड वर्षात इस्पितळाच्या दर्जा सुधारणीचे हे काम पूर्ण होण्याची शक्यता असून त्यानंतर दक्षिण गोव्यातील लोकांच्या सेवेसाठी हेअद्ययावत सुविधायुक्त इस्पितळ सज्ज होईल.
मुख्यमंत्री दिगंबर कामत यांनी केंद्र सरकारच्या या निर्णयाचे स्वागत केले असून नववर्ष व नाताळानिमित्त केंद्राची ही गोमंतकीयांना भेट असल्याची प्रतिक्रिया व्यक्त केली. केंद्राने मंजूर केलेल्या निधीतून दक्षिण गोव्यात एक परिपूर्ण सुपर स्पेशालिटी इस्पितळ साकारणार असल्याचे म्हटले आहे. केंद्राने गोवा सरकारला इस्पितळाच्या दर्जा सुधारणांचा तपशीलवार कार्यक्रमही पाठवला असल्याचे मुख्यमंत्र्यांनी सांगितले.