वास्कोच्याच धर्तीवर मडगावात दरोडा

खारेबांद येथील याच बंगल्यावरील दरोड्यात साडेआठ लाखांचा ऐवज पळविण्यात आला. (छाया - गोवा दूतसेवा)

सुरक्षा रक्षकाला बांधून बंगला फोडला
साठेआठ लाखांना लुबाडले
मडगाव, दि. २६ (प्रतिनिधी) : काल वास्को येथे झालेल्या दरोड्या पाठोपाठ तसाच धाडसी दरोडा काल उत्तररात्री येथील खारेबांध भागांत पडला व चोरट्यांनी तेथील सुरक्षारक्षकाला बांधून घालून साधारण साडेआठ लाखांचा ऐवज पळविला .पोलिसांना या दोन्ही दरोड्यात साम्य आढळलेले असून त्या दिशेने त्यांनी तपास सुरू केला आहे.
खारेबांध पुलाजवळच्या रिव्हर साळ रिअल इस्टेटमधील ज्युडी परेरा यांच्या बंगल्यावर हा दरोडा पडला. हा भाग कोलवा पोलिसांच्या हद्दीत येतो व तेथील पोलिस निरीक्षक फ्रांसिस कोर्त यांनी दिलेल्या माहितीनुसार सदर बंगला एरवी बंदच होता पण परैरा यांचे नातलग असलेले माजी आमदार लिओ व्हेल्यो यांचे पुत्र व सून त्यांच्या निवासाचे नूतनीकरण चालू असल्याने महिनाभरापूर्वीच तेथे राहावयास आले होते. काल ही मंडळी लिओ व्हेल्यो यांच्या मूळ घरी काही तरी कार्यक्रम असल्यामुळे गेली होती. बंगल्यावर सुरक्षा रक्षक तेवढा होता.
रात्रौ साधारण एक ते दीडच्या सुमारास आठजण फाटकाच्या बाजूने आत घुसले व त्यांनी सुरक्षा रक्षकाचे हात व पाय बांधून घातले व त्याच्या तोंडांत बोळा कोंबला. नंतर बंगल्याचे दार फोडून ते आत घुसले व बंगल्याचा कोपरानकोपरा त्यांनी धुंडाळला पण कपाटाच्या किल्ल्या न सापडल्याने त्यांनी कपाटाची दारे फोडून ती उघडली व आतून १७ अंगठ्या, १४ कर्णफुलांचे जोड,साखळ्या मिळून साधारण ८.०५ लाखांचा ऐवज पळविला.
जाताना त्यांनी बंगल्यात सापडलेली विदेशी बनावटीची उंची व्हिस्की बाटली नेली व आतून पाण्याच्या बाटल्या नेऊन बाहेर आवारात बसून ते साधारण अर्धी बाटली व्हिस्की प्याले व नंतर तेथून जाताना बाटलीतील व्हिस्की त्यांनी सुरक्षारक्षकाच्या डोळ्यांत ओतली .
ते गेल्याची खात्री पटल्यावर तो सुरक्षा रक्षक तसाच बांधलेल्या व व्हिस्की डोळ्यात गेल्याने आग आग होणाऱ्या डोळ्याच्या अवस्थेत पडून राहिला व नंतर सरकत सरकत फाटकाबाहेर गेला व तसाच खारेबांध पुलाजवळ राहणाऱ्या नातेवाइकाकडे जाऊन मेाठ्याने हाका मारत त्यांना उठविले. त्यांनी येऊन त्याच्या हातापायांच्या दोऱ्या कापल्या व त्यांना सर्व माहिती दिली. नंतर घरमालकाला कळविण्यात आले व त्यांनी येऊन पोलिस तक्रार नोंदविली .
पोलिसांनी लगेच हालचाल केली व तपासासाठी श्र्वानपथकाचाही मदत घेतली पण कुत्रे बंगल्यामागील भागापर्यंत गेले व परत फिरले.त्यावरून त्यांनी तेथे आणून एखादे वाहन ठेवलेले असावे असा कयास आहे.पोलिसांना बंगल्यात काही ठसे मिळालेले असून ते तपासाची दिशा ठरविण्यात मदतरुप ठरतील असा कयास आहे.
काल वास्को येथे एका वृद्ध दांपत्याला बांधून घालून झालेला दरोडा व आजचा हा दरोडा यात विलक्षण साम्य असून दोन्ही प्रकरणात एकच टोळी असावी की काय याचा तपास पोलिस करीत आहेत.

देशी इतिहासावर भर हवा

एनसीईआरटी पुस्तकावरील चर्चासत्राचा सूर

पणजी, दि. २६ (प्रतिनिधी) - गोवा शालान्त मंडळाने सातवीच्या विद्यार्थ्यासाठी "एनसीईआरटी' अभ्यासक्रमाचे लागू केलेले इतिहासाचे पुस्तक रद्द करून त्यात तीस टक्के देशी इतिहासाचा समावेश करण्याची जोरदार मागणी आज हिंदू जनजागृती समितीने आयोजित केलेल्या चर्चासत्रात करण्यात आली. त्याचप्रमाणे हे पुस्तक रद्द करण्यासाठी वैचारिक पातळीवर लढा देण्याचाही निर्धार यावेळी करण्यात आला. त्याचप्रमाणे पहिले ते बारावीपर्यंतच्या अभ्यासक्रमाचा पुनर्अभ्यास केला जावा, अशी मागणी यावेळी करण्यात आली.
या सातवीच्या पुस्तकात मोगलांची विस्तृत माहिती देण्यात आली असून त्या समकालीन भारतातील राजांची मात्र पुसटशीही माहिती देण्यात आलेली नाही. या पुस्तकात एका विशिष्ट धर्माचा उदो उदो करण्यात आला आहे. "मशीद'चे बांधकाम कसे असायचे याचीही माहिती या इतिहासाच्या पुस्तकात देण्यात आल्याचे यावेळी मडकई येथील आनंदीबाई विद्यालयाचे मुख्याध्यापक उमेश नाईक यांनी दिली. भगतसिंग क्रांतिकारी नसून दहशतवादी होते, रामायण काल्पनिक असून श्रीहनुमानाचीही विटंबना या पुस्तकात करण्यात आल्याचे त्यांनी यावेळी सांगितले. देशद्रोही शक्तीने "एनसीईआरटी'च्या माध्यमातून भारताचा उज्ज्वल भूतकाळ लपवून ठेवण्याचा कटकारस्थान रचले आहे, असे मत श्री. नाईक यांनी यावेळी व्यक्त केले. शिक्षणात अन्य विषयांप्रमाणेच इतिहास हा विषय अत्यंत महत्त्वाचा आहे. त्याने नवी पिढी घडते. प्राथमिक स्तरावर विद्यार्थ्यांना स्थानिक इतिहास शिकवला जावा, असा राज्याचा नियम आहे. परंतु, त्याला फाटा देऊन केवळ मोगलांचा आणि ब्रिटिशांचा इतिहास शिकवला जात असल्याचे सांगून हे पुस्तक रद्द करून स्थानिक इतिहासाचा समावेश करूनच नव्याने पुस्तक प्रकाशित केले जावे, अशी मागणी त्यांनी यावेळी केली.
कागद कमी पडतो म्हणून "मनुस्मृती' ग्रंथ पुसून तो कागद लिहिण्यासाठी एका लेखकाने वापरला, असे उदाहरण या पुस्तकात देण्यात आल्याची माहिती यावेळी धर्म शक्ती सेनेचे प्रमुख सदाशिव धोंड यांनी दिली. हे आंदोलन गोवा तसेच महाराष्ट्र राज्यातही चालवले जात असल्याचे ते म्हणाले. शिक्षणाच्या माध्यमातून पुन्हा एकदा भारत ताब्यात घेण्याचे षड्यंत्र सुरू असल्याचे मत यावेळी जयेश थळी यांनी व्यक्त केले.
मोठ्या प्रमाणात सनातन संस्थेला विरोध केला जात आहे. काही राजकीय पक्षाचे कार्यकर्ते धमक्या देत आहेत. सनातन प्रभात या वर्तमान पत्राच्या संपादकांना दोन वेळा तुरुंगात डांबण्याचा प्रकार घडला. मुंबईत बॉंम्बस्फोट झाला त्यावेळी कोणतेही पुरावे नसताना "सनातन संस्थेवर बंदी घातली' अशा बातम्या प्रसिद्ध करून बदनाम करण्याचा प्रयत्न केला असल्याची माहिती यावेळी सौ. शोभा सावंत यांनी दिली. सनातन संस्थेने राष्ट्र पुरुषांचे छायाचित्र वापरून वह्या छापल्या आहेत. त्याचप्रमाणे त्यांची माहितीही पहिल्या व शेवटच्या पानांवर देण्यात आली आहे, अशी माहिती शुभांगी गावणेकर यांनी दिली. यावेळी मुख्याध्यापक अरुण नागवेकर, पालक प्रकाश मळीक, सुशांत दळवी, निवृत्त शिक्षिका कुमुद कामत यांनी आपले मत व्यक्त केले.

गस्तीवरील निरीक्षकावर पोलिसाकडूनच हल्ला

निलंबनाची खात्याची कारवाई

वास्को, दि. २६ (प्रतिनिधी)- रात्रीच्यावेळी गस्तीवर असलेल्या मुरगाव पोलीस उपनिरीक्षकावर हल्ला करून त्यांचा गणवेश फाडल्याने अनिल कवळेकर या पोलिस शिपायाला (सशस्त्र विभाग) अटक करण्यात आली. रायबंदर पोलिस स्थानकावर नियुक्त असलेल्या पोलिस शिपायाने दारूच्या नशेत पोलिस उपनिरीक्षक प्रशल देसाई यांच्यावर हल्ला केला असून त्याला अटक केल्यानंतर आज निलंबित करण्यात आले.
मुरगाव पोलिसांनी दिलेल्या माहितीनुसार काल (दि२६) रात्री दोन वाजण्याच्या सुमारास सदर घटना घडली. मुरगाव पोलिस स्थानकाचे उपनिरीक्षक प्रशल देसाई व इतर पोलिस कर्मचारी रात्रीच्या वेळी पी.सी.आर.गाडीमध्ये पोलिस गस्तीवर असताना सडा भागातील एका दारूच्या दुकानासमोर त्यांना पाच तरुण उभे असल्याचे दिसून आले. त्या तरुणांना तेथून निघून जाण्यास बजावले असता चार जण येथून निघून गेले, मात्र पाचवा (अनिल) तरुण येथून जाण्यास नकार देत असल्याने त्यांनी यावेळी त्याच्यावर कारवाई करणार असल्याचे सांगितले. त्यावेळी अनिलने आपण पोलीस शिपाई असल्याचे गस्तीवर असलेल्या पोलिसांना सांगण्यास सुरुवात केली. या बाचाबाचीत अनिलने तेथे गस्ती घालत असलेल्या पोलिस कर्मचाऱ्यांना ढकलाढकली करण्यास सुरुवात केली, त्यावेळी पोलिस उपनिरीक्षक देसाई यांनी मध्यस्थी करण्याचा प्रयत्न केला. अनिलने त्यांच्यावर हल्ला करून त्याचा गणवेश फाडला व येथून पळ काढण्याचा प्रयत्न केला. तो दारूच्या नशेत असल्याने येथे असलेल्या गटारात पडल्याचे पोलीस उपनिरीक्षक प्रशल देसाई यांनी पत्रकारांना माहिती देताना सांगून त्यास ताब्यात घेऊन अटक करण्यात आल्याची माहिती यावेळी दिली.
मुरगाव पोलिसांनी रायबंदर येथील पोलिस स्थानकावर नियुक्त असलेल्या अनिल कवळेकर (वय २५, रा. सडा) या पोलीस शिपायाला भा.द.स ३३२ कलमाखाली अटक केल्याची माहिती पोलीस निरीक्षक राम आसरे यांनी दिली असून आज संध्याकाळी त्याची जामिनावर सुटका करण्यात आल्याची माहिती त्यांनी यावेळी दिली. दरम्यान, सदर प्रकरणावर कारवाई करत अनिल यास निलंबित करण्यात आले असल्याचे पोलीस सूत्रांनी सांगितले असून मुरगाव पोलीस स्थानकाचे निरीक्षक राम आसरे यांच्या मार्गदर्शनाखाली पुढील तपास चालू आहे.

पाकमध्ये स्फोटात १३ विद्यार्थीनी ठार

इस्लामाबाद, दि.२६ - पाकमधील वायव्य सरहद्द प्रांतात मुलींच्या प्राथमिक शाळेबाहेर झालेल्या शक्तिशाली बॉम्बस्फोटात १३ विद्यार्थीनी ठार तर ४० हून अधिक जखमी झाल्याची भीषण घटना घडली.
वायव्य पाकिस्तानातील दिर जिल्ह्यात ही घटना घडली. येथील मुलींच्या प्राथमिक शाळेबाहेर एका खेळण्यामध्ये बॉम्ब ठेवण्यात आला होता. लहान मुलींनी हे खेळणे उत्सुकतेपोटी हातात घेतले आणि खेळायला लागल्या, तेवढ्यातच स्फोट झाला. या दुर्दैवी घटनेत १३ बालिका जागीच ठार झाल्या. अधिकृतरित्या मात्र सात विद्यार्थीनींचाच मृत्यू झाल्याचे सांगितले जात आहे.
या स्फोटात ४० विद्यार्थी जखमी असून सर्वांना स्थानिक रुग्णालयात दाखल करण्यात आले आहे. काहींची प्रकृती गंभीर असल्याचे समजते. मरण पावलेल्या विद्यार्थीनींचे वय ४ ते १२ वर्षांदरम्यान असल्याचे सांगितले जात आहे. राष्ट्राध्यक्ष आसीफ अली झरदारी आणि पंतप्रधान युसुफ रझा गिलानी यांनी या घटनेची कठोर शब्दात निंदा केली असून चौकशीचे आदेश जारी केले आहेत.

योगिता नाईक व दर्शना नाईक खून प्रकरणांना वाचा फुटली

फोंडा, दि.२५ (प्रतिनिधी) : शिरोडा येथील एका युवतीवर बलात्कार प्रकरणी फोंडा पोलिसांनी अटक केलेल्या तरवळे शिरोडा येथील महानंद आर. नाईक याने फोंडा भागातील दोन युवतींचा खून केल्याची कबुली दिली आहे.
योगिता खुशाली नाईक ( नागझर कुर्टी) आणि कु. दर्शना तुकाराम नाईक (शिरोडा) अशी खून करण्यात आलेल्या युवतींची नावे आहेत. योगिता हिची मोर्ले सत्तरी येथे गळा आवळून आणि दर्शना नाईक हिचा बांबोळी येथे खून करण्यात आला आहे. चोरीच्या उद्देशाने हे दोन्ही खून करण्यात आल्याचे फोंड्याचे पोलिस उपअधीक्षक सेराफीन डायस यांनी सांगितले.
नागझर कुर्टी येथे कु. योगिता नाईक बेपत्ता प्रकरणी फोंडा पोलिस चौकशी करीत असताना शिरोडा येथील एका युवतीवरील बलात्कार प्रकरणाला वाचा फुटली. त्यानंतर आता योगिता नाईक आणि दर्शना नाईक यांच्या खून प्रकरणाला वाचा फुटली आहे. नागझर कुर्टी येथील प्रमोद खुशाली नाईक यांनी १२ जानेवारी ०९ रोजी त्याची बहीण कु. योगिता खुशाली नाईक (३० वर्षे) बेपत्ता असल्याची तक्रार दाखल केली होती. बाजारमळ फोंडा येथे एका समारंभाला जाते असे सांगून कु. योगिता घरातून बाहेर पडली होती. यावेळी तिने अंगावर सोळा ग्रामाची सोनसाखळी, चार सोन्याच्या बांगड्या, कानात सोन्याची कर्णफुले, सोन्याची अंगठी आहे तक्रारीत म्हटले होते.
या प्रकरणाची चौकशी करण्यासाठी पोलिसांनी कु. योगिता हिच्या मोबाईल क्रमांकाची सविस्तर माहिती संबंधित मोबाईल कंपनीकडून मिळविली. ह्या माहितीची तपासणी करताना एक मोबाईल क्रमांक योगिता हिच्याशी सतत संपर्कात होता. पोलिसांनी सदर मोबाईल क्रमांक धारकाचा पत्ता शोधून त्याला चौकशीसाठी पोलिस स्टेशनवर बोलावून घेतले. सदर व्यक्तीने आपला हा मोबाईल फोंडा ते सावर्डे मार्गावर प्रवास करताना जून - जुलै २००८ मध्ये हरवल्याचे पोलिसांनी सांगितले. त्यानंतर पोलिसांनी मोबाईल कंपनीशी संपर्क साधून सदर क्रमांकाची अधिक चौकशी केली. सदर क्रमांकाचे सीम कार्ड चार मोबाईल हॅण्डसेट मध्ये घालून वापरण्यात आलेले आहे, अशी माहिती प्राप्त झाली. त्यानंतर ज्याच्या मोबाईल मध्ये सिमकार्ड घालण्यात आले त्या सर्वांना पोलिसांनी चौकशीसाठी पाचारण केले. त्यात एका मोबाईल दुरुस्ती करणाऱ्या मॅकेनिकचा समावेश होता. महानंद नाईक आणि एका युवतीला चौकशीसाठी बोलाविण्यात आले. सदर युवतीकडील सिमकार्ड महानंद वापरीत असल्याची माहिती त्या युवतीने पोलिसांना दिली. तरीही महानंद ह्या प्रकरणी आपला काहीच सहभाग नसल्याचे पोलिसांना सांगत होता. गेल्या चार वर्षापासून महानंद आपल्याला ब्लॅकमेल करीत असून धमकी देऊन आपल्यावर बलात्कार करीत आहे, अशी तक्रार त्या युवतीने केली. त्यानंतर पोलिसांनी महानंद याच्या विरोधात बलात्काराचा गुन्हा दाखल केला. जानेवारीच्या पहिल्या आठवड्यात महानंद फोंड्यात आला होता. त्यावेळी त्याने योगिता हिच्याशी ओळख केली आणि तिचा मोबाईल क्रमांक घेतला होता. महानंद हा त्याला सापडलेल्या मोबाईलवरून योगिता व इतरांशी संपर्क करीत होता. ६ ते १० जानेवारी ०९ पर्यंत महानंद याने योगिता हिच्याशी भरपूर वेळा संपर्क साधला. ज्या दिवसापासून योगिता बेपत्ता झाली त्या दिवसापासून दोन्ही मोबाईल क्रमांक बंद ठेवण्यात आले आहेत. या प्रकरणी पोलिसांनी महानंद याला उलटसुलट प्रश्न विचारून तपास केला. तरीही त्याने कबुली दिली नव्हती. आपण बोरी व फोंड्याच्या बाहेर गेलेलो नाही, असे महानंद याने पोलिसांना सांगितले. पोलिसांनी याप्रकरणी मोबाईल कंपनीशी संपर्क साधून चौकशी केली असता १० जानेवारी ०९ रोजी महानंद हा साखळी येथे असल्याची माहिती उजेडात आली. त्यानंतर पोलिसांनी आपला हिसका दाखविल्यानंतर महानंद याने खुनाची कबुली दिली. योगिता हिने अंगावर घातलेले दागिने चोरण्यासाठी संशयित महानंद याने तिला १० जानेवारी ०९ रोजी साखळी मार्गे मोर्ले सत्तरी येथील एका काजू बागायतीमध्ये नेऊन तेथे तिचा गळा आवळून खून केला. कु. योगिता हिची ओळख पटू नये म्हणून तिच्या अंगावर मोजकेच कपडे ठेवले. तिचे इतर कपडे व दागिने सोबत घेऊन पलायन केले. चोरण्यात आलेले दागिने डिचोली येथील एका सोनाराला विकण्यात आले, अशी कबुली संशयित महानंद नाईक याने दिली आहे. खून करण्यात आलेली जागा संशयित महानंद याने पोलिसांना दाखविली आहे. १५ जानेवारी ०९ रोजी एका युवतीचा मृतदेह कुजलेल्या अवस्थेत वाळपई पोलिसांना मोर्ले येथे काजू बागायतीमध्ये आढळून आलेला आहे. महानंद याच्या विरोधात भा.दं.सं.च्या ३९२, ३०२, २०१ कलमाखाली गुन्हा दाखल करण्यात आला आहे.
याच पद्धतीने १९९४ साली शिरोडा येथील कु. दर्शना तुकाराम नाईक हिचा बांबोळी येथे खून केल्याची कबुली संशयित महानंद नाईक याने दिली आहे. यासंबंधी पोलिसांनी आगशी पोलिसांशी संपर्क साधून चौकशी केली असताना संशयास्पद स्थितीत एका युवतीचा मृतदेह आढळून आलेला आहे, असेही पोलिस सूत्रांनी सांगितले. याप्रकरणी सध्या तपास जोरात सुरू आहे. उत्तर गोव्याचे अधीक्षक टोनी फर्नांडिस, उपअधीक्षक सेराफीन डायस यांच्या मार्गदर्शनाखाली पोलिस निरीक्षक सी. एल. पाटील, उपनिरीक्षक संजय दळवी या प्रकरणी तपास करीत आहेत.

पाकिस्तानी लष्करप्रमुखांचा तालिबानला सज्जड इशारा

इस्लामाबाद, दि. २५ : तालिबानने ४८ तासांच्या आत बुनेर सोडून निघून जावे अन्यथा पाकिस्तानी लष्कर कठोर कारवाई केल्याशिवाय राहणार नाही अशा कडक शब्दात पाकचे लष्कर प्रमुख जनरल अश्फाक कयानी यांनी इशारा दिला आहे.
तालिबानच्या वाढत्या कारवाया आणि पाकमधील वाढत्या वर्चस्वामुळे पाकिस्तानी लष्कराच्या "प्रोफेशनल' या ख्यातीला चांगलाच हादरा बसला आहे. आता तर पाकी जनतेचाही आपल्या सैन्यावरून विश्वास उडत चालला आहे. काही बंदूकधाऱ्यांच्या दराऱ्याला एवढी मोठी फौज घाबरत असल्याचे पाकिस्तानी जनतेला वाटते. यामुळे अहंभाव दुखावलेल्या कयानी यांनी तालिबान्यांना कठोर शब्दांत "निर्वाणीचा इशारा' दिला आहे.
तालिबानला ४८ तासांच्या आत बुनेर सोडून निघून जाण्याचा इशारा कयानी यांनी दिला असून जर तालिबानने हेकेखोरपणा सोडला नाही तर त्यांना धडा शिकविण्यासाठी लष्करालाही आदेश देण्यात आले असल्याची माहिती रावळपिंडी येथील लष्करी मुख्यालयाच्या सूत्राने दिली आहे.
पाकिस्तानी लष्कर कोणत्याही स्थितीत तालिबानला पराभूत केल्याशिवाय राहणार नाही. कोणाचेही वर्चस्व पाकच्या भूमीवर आम्ही खपवून घेणार नाही. अशांना परत पिटाळूनच आमचे सैनिक दम घेतील असा विश्वास कयानी यांनी व्यक्त केला आहे. कयानी कितीही आरोळ्या ठोकत असले तरी पाकमधील खरी स्थितीत जगापासून लपून राहिली नाही. आजवर यांनी बघ्याची भूमिका घेतली असे पाकिस्तानी मुत्सद्यांना वाटते. या "अल्टीमेटम'कडे पाकी लष्कराची प्रतिष्ठा सुधारण्याचा प्रयत्न म्हणून बघितले जात आहे.

'आमचे पाय अजूनही जमिनीवरच' लिटल चॅंपच्या पंचरत्नांशी सुसंवाद रंगला

पणजी,दि.२५ (प्रतिनिधी) : 'आमच्या डोक्यात अजून हवा गेली नाही त्यामुळे आमचे पाय अजूनही जमिनीवरच आहेत.झी मराठी सारेगमप मालिकेमुळे आम्हा सर्वांना लोकप्रियता मिळाली. तथापि, त्यामुळे आम्ही फार मोठे कलाकार झालो आहोत, असे अजिबात वाटत नाही,'असे उद्गार आर्या आंबेकरने काढले.लिटल चॅम्प्सच्या "पंचरत्नां'चे आज गोव्यात आगमन झाले.पणजी येथील कांपाल मैदानावर आयोजित कार्यक्रमात भाग घेण्यासाठी आलेल्या या छोट्या कलाकारांनी स्थानिक पत्रकारांशी संवाद साधला तेव्हा ही मुले प्रगल्भतेच्या बाबतीतही खरोखरच "चॅंपियन'असल्याची सहजच प्रचिती आली.
"तरूण भारत'व तरंगिणी प्रतिष्ठान यांच्या संयुक्त विद्यमाने आयोजिलेल्या या कार्यक्रमाच्या निमित्ताने या लिटल चॅंप्सना प्रत्यक्ष पाहण्याचा व ऐकण्याची संधी गोमंतकीयांना मिळाली."झी' मराठी सारेगमप या मालिकेतून आपल्या सुरेल आवाजाने सर्वांना मोहून टाकलेल्या या कलाकारांचा आत्मविश्वास कुणालाही लाजवेल असाच होता.आपल्या भविष्यातील प्रवासाबद्दल हे छोटे कलाकार ठाम असल्याचे त्यांच्याशी संवाद साधला असता प्रकर्षाने जाणवले.
चौथी उत्तीर्ण होऊन आता पाचवीत गेलेली मुग्धा वैशंपायन हिचे विलोभनीय हास्य पाहातच राहावे असे. येत्या २९ रोजी या लिटल चॅप्ससाठी केसरी टूर्स ऍण्ड ट्रॅव्हल्सतर्फे विदेशात सफर आयोजित केली आहे,याबाबत तिला बरीच उत्सुकता दिसली.शाळा व कार्यक्रम यांची सांगड कशी घालता,असे विचारले असता कार्यक्रमाला जाताना पुस्तके सोबत घेऊनच जातो,असे प्रथमेश लघाटे म्हणाला.परीक्षेची तयारी करण्यासाठी सुट्टी होती त्यामुळे अभ्यास करायला मिळाला,असेही तो म्हणाला.
लिटल चॅम्प्सच्या महा अंतिम फेरीनंतर आतापर्यंत एकूण १० कार्यक्रम केल्याचे रोहित राऊत म्हणाला. "युनिव्हर्सल'तर्फे "पंचरत्न'ही डीव्हीडी प्रकाशित करण्यात आली असून याच कंपनीतर्फे नव्या गाण्यांची व मूळ आवाजातील गाण्यांची सीडी तयार केली जाणार असल्याचे त्याने सांगितले.झी सारेगमप विजेती कार्तिकी गायकवाड काहीशी गप्पच होती. गोव्यातील प्रसन्न वातावरणामुळे भारावून गेेलल्या कार्तिकीदेवींना काय बोलावे तेच सुचेनासे झाले होते.आपण सध्या आपल्या बाबांकडे शिकते व यापुढे पंडित अजय पोहनकर यांच्याकडे संगीताचे शिक्षण घेणार असल्याचे ती म्हणाली.
या कार्यक्रमाच्या निमित्ताने किती गाणी तयार केली,असा सवाल केला असता किमान शंभर असतील,असे आर्या म्हणाली.नाट्यसंगीत हा आपला आवडता प्रांत व नाट्यसंगीतातील दैवत म्हणजे पं.जितेंद्र अभिषेकी. तेच आपले गुरू होते. नाट्यसंगीताची ही परंपरा पुढे नेण्यासाठी आपण प्रयत्न करणार असून त्याबाबतची उदासिनता दूर करणे हे आपले लक्ष्य असल्याचेे प्रथमेश म्हणाला. अभिजात शास्त्रीय संगीतात पुढे जाण्याची आपली इच्छाही त्याने यावेळी प्रकट केली.
"आम्हा कलाकारांवर लोकांनी एवढं भरभरून प्रेम केले आहे की, त्यामुळेच आम्ही आज या जागेवर पोहचलो'असे आर्या म्हणाली.आम्ही आमच्या मित्रांशी नेहमीसारखेच वागतो व मित्रही तसेच वागतात त्यामुळे या यशाचा मैत्रीत कोणताही अडथळा येत नाही, असे या कलाकारांनी गप्पांच्या ओघात सांगून टाकले.
डॉ.अजय वैद्य यांनी प्रास्ताविक केले व या पंचरत्नांची ओळख करून दिली. यावेळी पत्रकारांनी विचारलेल्या विविध प्रश्नांना या कलाकारांनी उत्स्फूर्तपणे उत्तरे दिली व त्यामुळे हा सुसंवादाचा कार्यक्रम उत्तरोत्तर रंगत गेला.

विश्वजित यांचे मंत्रिपद काढा : आयरिश

पणजी, दि. २५ (प्रतिनिधी) : माजी वित्तमंत्री दयानंद नार्वेकर यांना लागू केलेला निकष आता आरोग्यमंत्री विश्वजित राणे यांनाही लागू करावा व त्यांच्याविरुद्ध आरोपपत्र दाखल करण्याचा आदेश न्यायालयाने जारी केल्याने त्यांचे मंत्रिपद काढून घ्यावे,अशी मागणी ऍड.आयरिश रॉड्रिगीस यांनी केली आहे.
ऍड. आयरिश यांना जीवे मारण्याची धमकी मोबाईवरून दिल्याप्रकरणी विश्वजित राणे अडचणीत आले आहेत. पणजीच्या प्रथमवर्ग न्यायदंडाधिकारी शर्मिला पाटील यांनी जुने गोवे पोलिसांना आरोग्यमंत्र्याविरुद्ध आरोपपत्र सादर करण्याचे आदेश दिल्याने त्याचे थेट परिणाम सरकारवर होणार असल्याचे स्पष्टपणे दिसत आहेत. ऍड. नार्वेकर यांच्याविरोधात क्रिकेट तिकीट घोटाळाप्रकरणी आरोपपत्र दाखल करण्यात आले होते व ते निमित्त पुढे करून त्यांना मंत्रिपदाचा राजीनामा देण्यास मुख्यमंत्री दिगंबर कामत यांनी भाग पाडले होते.
कॉंग्रेसच्या एखाद्या मंत्र्यांविरोधात आरोपपत्र सादर झाल्यास त्या मंत्र्याने आपल्या पदाचा राजीनामा द्यावा,असा पायंडा कॉंग्रेसश्रेष्ठींनी पाडला असल्याचे सांगण्यात आले होते. साहजिकच नार्वेकरांप्रमाणे आरोग्यमंत्र्यांविरुद्धही आरोपपत्र दाखल होणार असल्याने मुख्यमंत्र्यांनी त्यांनाही मंत्रिपदाचा राजीनामा देण्यास भाग पाडावे,अशी मागणी ऍड. रॉड्रिगीस यांनी केली आहे.
नार्वेकरांकडील मंत्रिपद काढून त्याजागी ताळगावचे आमदार बाबूश मोन्सेरात यांची मंत्रिमंडळात वर्णी लावण्यात आली होती. मुळात ऍड.रॉड्रिगीस धमकी प्रकरणी सरकारी वकिलांनी सुरुवातीस आरोग्यमंत्र्यांविरुद्ध आरोपपत्र दाखल केले जाईल, असे आश्वासन मुंबई उच्च न्यायालयाच्या गोवा खंडपीठाला दिले होते. जुनेगोवे पोलिस निरीक्षक गुरूदास गावडे यांनी या प्रकरणाची चौकशीच बंद करून ते फाईलबंद करण्याचे प्रयत्न केल्याने ऍड. रॉड्रिगीस यांनी याप्रकरणी न्यायालयात धाव घेतली होती. निरीक्षक गावडे यांनी याप्रकरणी प्रॉसिक्युशन संचालकांच्या आदेशानुसार आपण आरोपपत्र दाखल केले नसल्याचे म्हटले होते.
आरोग्यमंत्री राणे आपल्या पदावर राहिल्यास ते पोलिस चौकशीत हस्तक्षेप करण्याचा धोकाही ऍड. रॉड्रिगीस यांनी व्यक्त केला. आरोपांतून दोषमुक्त होण्यापूर्वी विश्वजित यांनी आपल्या मंत्रिपदाचा राजीनामा द्यावा व निःपक्षपाती व दबावविरहित चौकशीस साहाय्य करावे,असेही ते म्हणाले. मुख्यमंत्री कामत यांनी तात्काळ राणे यांना मंत्रिपदाचा राजीनामा देण्यास भाग पाडावे अन्यथा त्यांना मंत्रिमंडळातून डच्चू द्यावा,अशी मागणी राज्यपाल एस. एस. सिद्धू यांच्याकडे आपण करणार आहोत, असेही ऍड.रॉड्रिगीस यांनी नमूद केले.

श्री देवी लईराई जत्रोत्सवात सहभागी होणारे व्रतस्थ चौगुले (मानकरी). सोबत पुजारी वासुदेव जोशी व श्रीपाद जोशी ( छाया : दुर्गादास गर्दे)

वास्कोत दरोडा

वास्को, दि. २५ (प्रतिनिधी)- दाबोळी, जयरामनगर येथील एका प्रशस्त बंगल्यात काल रात्री आठ अज्ञात दरोडेखोरांनी सोनेचांदी व इतर मौल्यवान वस्तू मिळून दोन लाखांचा ऐवज लंपास केला. घरात वृद्ध जोडपे राहत असल्याची संधी साधून त्यांना हत्याराचा धाक दाखवून हा ऐवज लुटण्यात आला. दरम्यान, पोलिसांना अद्याप कोणतेच धागेदोरे सापडले नाहीत.
आज ( दि. २५) पहाटे ३ ते ४ च्या सुमारास ही घटना घडली. जयरामनगर या धनिकांच्या वस्तीमधील लोक साखरझोपेत असताना चौफीन कुटुंबीयांच्या बंगल्याच्या खिडकीच्या काचा काढून आठ अज्ञात दरोडेखोरांनी आत प्रवेश केला. त्यांनी सर्वप्रथम क्रिस्टिना चौफीन यांना दंडुक्याच्या साह्याने जागे केले, त्यांच्याच घरातील कपडे काढून आपले तोंड लपवले. "चिल्लाओ मत' व नंतर "डोंट शाऊट' अशा सूचना त्यांनी दिल्या. क्रिस्टिना यांना शस्त्राचा धाक दाखवून त्यांच्याकडून कपाटाच्या चाव्या त्यांनी मिळवल्या व आतील सोन्याचांदीचे दागिने व इतर सामान मिळून सुमारे दोन लाखाचा ऐवज घेऊन पळ काढला. जाण्यापूर्वी त्यांनी चौफीन यांच्या घरातील मोबाईल संचही आपल्यासोबत नेल्याची माहिती पोलिसांनी दिली. पोलिसांना याबाबत कळवल्यास जिवंत मारण्याची धमकी त्यांनी जातेवेळी दिली.
बंगल्यामध्ये फक्त वृद्ध दाम्पत्य राहत असल्याची व कमांडण्ट चौफीन हे एकदम आजारी असल्याची जाणीव त्यांना कशी झाली, असा प्रश्न पोलिसांपुढे निर्माण झाला आहे. सदर घटना पहाटे घडली असली तरी उशिरा रात्री पर्यंत वास्को पोलिस यासंदर्भात काहीही बोलण्यास तयार नसल्याचे दिसून आले.
दरोडा घालण्यासाठी आलेले आठही दरोडेखोर केवळ चड्डीवर आल्याचे पोलिस सूत्रांनी सांगितले. वृद्ध पती पत्नीच्या हातातील अंगठ्याही त्यांनी या वेळी काढून नेल्याचे उघड झाले आहे.
वास्को पोलिसांनी श्वान पथक व ठसे तज्ज्ञांच्या साह्याने पंचनामा केला असून गुन्हा नोंदवला आहे. दरोडा घालण्यासाठी आलेल्या सर्व अज्ञातांजवळ दंडुका, स्क्रू-ड्रायव्हर सारखी हत्यारे असल्याची माहिती सूत्रांकडून मिळाली आहे. पोलिस निरीक्षक ब्राझ मिनेझीस यांनी "गोवा दूत'शी बोलताना या गोष्टींना दुजोरा दिला.
दरम्यान वास्को पोलिस याबाबत अधिक तपास करत असल्याचे सांगून अधिक माहिती देण्यास त्यांनी नकार दिला. वास्कोमध्ये दुकानफोडी, मंदिरामध्ये चोरीची प्रकरणे, फ्लॅट फोडून चोऱ्या करण्याच्या प्रकारांत यंदा मोठ्या प्रमाणात वाढ झाल्याने पोलिसांची झोप उडाली आहे.