'फरारी' नेताजी परब जयपूरहून परतणार!

पणजी, पेडणे, दि.२ (प्रतिनिधी) - नेताजी परब ऊर्फ प्रभुदेसाई हा फरारी नसून तो जयपूर येथे कामानिमित्त गेला आहे. येत्या दोन दिवसांत तो गावी परतेल, असे स्पष्टीकरण त्याचे वडील संजय प्रभुदेसाई यांनी केले. याप्रकरणी पोलिस विनाकारण तो फरारी असल्याचे सांगून जनतेची दिशाभूल करीत असल्याचा आरोपही त्यांनी केला आहे. नेताजी हा या प्रकरणातील अन्य एक महत्त्वाचा साक्षीदार असल्याने त्याला ताब्यात घेतल्यानंतरच या टोळीतील महाभागांचा पर्दाफाश होईल, असा दावा पेडणेचे निरीक्षक उत्तम राऊत देसाई यांनी केल्याने आता पेडणे येथील तथाकथित वेश्या व्यवसाय प्रकरणाच्या चौकशीला जोर प्राप्त झाला आहे.
दरम्यान, याप्रकरणी सध्या पेडणे पोलिसांच्या ताब्यात असलेला निलंबित पोलिस शिपाई राजेश सावंत याच्या पोलिस कोठडीची मुदत उद्या ३ रोजी संपत असल्याने त्याचे पुढे काय होणार,याकडेही अनेकांचे लक्ष लागून आहे. याप्रकरणी दै."गोवादूत'ने पाठपुरावा केल्याने या प्रकरणाशी संबंध असलेल्यांचे सध्या बरेच धाबे दणाणले असून त्यांनी हे प्रकरण दडपून टाकण्यासाठी जोरदार हालचाली सुरू झाल्याची खबर मिळाली आहे. यासंबंधी अलीकडेच त्यांनी गृहमंत्री रवी नाईक यांचीही भेट घेतल्याची माहिती उपलब्ध झाली असून श्री.नाईक यांनी त्यांना परतवून लावल्याचीही जोरदार चर्चा सध्या या भागात सुरू आहे. राजेश सावंत याच्याकडून आल्टोकार व २५ हजार रोख जप्त करण्यातही पोलिसांनी यश मिळवले. राजेश सावंत याने नेताजी प्रभुदेसाई याचे नाव सांगितल्याने पोलिस सध्या त्याच्या मागावर आहेत. नेताजी याला ताब्यात घेतल्यास अनेकांच्या नावांचा पर्दाफाश होणार असल्याने पोलिसही त्याचा शोध घेत आहेत. याप्रकरणात गुंतलेले काही लोक एव्हानाच परराज्यात परागंदा झाल्याचे वृत्त आहे तर याप्रकरणाशी संबंध असल्याचा संशय असलेल्या काही लोकांकडून सध्या राजकीय नेत्यांचे उंबरठे झिजवणे सुरू असल्याची माहिती मिळाली आहे.
मोबाईल क्लिप्समुळे खळबळ
दरम्यान,पेडणे भागांत जुगाराच्या अनुषंगाने सुरू असलेल्या या वेश्याव्यवसायातून येथील स्थानिक मुलींच्या मोबाईलवरील अश्लील क्लिप्स सध्या पेडणे भागांत फिरत असून यातही याच तथाकथित टोळीचा हात असल्याची खळबळजनक माहिती मिळाली आहे. आर्थिक विवंचनेत असलेल्या तसेच इतर काही मुलींना पैशांचे आमिष दाखवून त्यांचा उपभोग घेऊन त्यांच्या अश्लील मोबाईल क्लिप्स टिपल्याचा प्रकारही घडल्याची माहिती मिळाली आहे. हे क्लिप्स सध्या पेडणे तथा इतरही काही वितरित होत आहेत. या प्रकरणांत पोलिसांचा सहभाग असल्याने हे क्लिप्स सुरुवातीला पोलिसांकडेच फिरत होते,अशीही खबर आहे. दरम्यान,पोलिस खात्यातील काही नव्या पोलिस मुलींनाही या टोळीतील पोलिसांनी गुंतवल्याची नवी माहिती प्राप्त झाली आहे. या प्रकरणाची चौकशी झाल्यास पोलिस खात्यात सुरू असलेल्या या भानगडींचा पर्दाफाश होऊन पोलिस खात्याची बेअब्रू अटळ आहे,असेही आता उघडपणे बोलले जात आहे.
एवढे करूनही जुगार पुन्हा सुरू
पेडणेतील या तथाकथित वेश्याव्यवसाय प्रकरणाचे मूळ हे जुगार असल्याचे उघड असताना व सध्या हे प्रकरण ताजे असताना आता नव्याने जुगार सुरू झाल्याची खात्रीलायक माहिती मिळाली आहे. मांद्रे येथे एका ठिकाणी काल रात्री हा जुगार सुरू करण्यात आल्याची खबर काही नागरिकांनी दिली आहे. या जुगाराला महाराष्ट्रातून मोठ्या प्रमाणात लोक खेळायला आल्याचीही खबर आहे. पोलिसांचे हप्ते ठरवूनच हा जुगार सुरू करण्यात आल्याची खबर मिळाली असून पोलिस व गुन्हा विभागाला या जुगाराचे मोठे हप्ते पोहचतात,अशीही खबर आहे.
"गोवादूत'च्या धाडसाचे कौतुक

पेडणे येथील तथाकथित वेश्या व्यवसाय व वाढत्या जुगाराबाबत दै."गोवादूत'ने चालवलेल्या पाठपुराव्याचे या भागातील अनेक नागरिकांनी फोन करून कौतुक केले.या प्रकरणाची व्याप्ती ही फोंडा येथील महानंद नाईक प्रकरणाएवढीच मोठी आहे,असेही या लोकांनी सांगितले. या प्रकरणांबाबत प्रत्यक्ष स्थानिक लोक उघडपणे बोलत नसले तरी हा प्रकार पूर्णपणे सत्य असून "गोवादूत' ने हा विषय लावून धरावा,असे सांगत योग्य वेळ येताच नागरिकही या टोळीचा भांडाफोड करतील,असेही ते म्हणाले. मुळात या प्रकरणांत पोलिसच भागीदार असल्याने स्थानिकांना माहिती असूनही ते देण्याचे धाडस कुणालाही होत नाही,अशी माहिती एका नागरिकाने दिली. पोलिस या प्रकरणाची चौकशी करीत असल्याचे भासवत असले तरी हे प्रकरण दडपून टाकण्याचेच प्रयत्न जास्त होत आहेत. या प्रकरणाची चौकशी स्वतंत्र यंत्रणेमार्फत करण्यात यावी, अशी मागणी करून या टोळीचा पर्दाफाश होणे अत्यंत गरजेचे असल्याचे यावेळी अनेकांनी सांगितले.