'कॅल्शियम कार्बाइड' चा वापर वास्कोत तीन गोदामांवर छाप्यात बारा टन 'हानिकारक' आंबे जप्त

वास्को, दि. १६ (प्रतिनिधी): वास्कोच्या बाजारात विकण्यात येत असलेले आंबे पिकवण्याकरिता त्यात "कॅल्शियम कार्बाइड' रसायनाची पावडर वापरण्यात येत असल्याचे उघडकीस येताच आज खारीवाडा येथील तीन गोदामांवर छापे टाकून सुमारे बारा टन आंबे जप्त करण्यात आले. मुरगावचे उपजिल्हाधिकारी लेविन्सन मार्टिन्स यांच्या मार्गदर्शनाखाली सदर छापा टाकण्यात आला असता जप्त करण्यात आलेल्या आंब्यांमध्ये रसायनाचा वापर करण्यात येत असल्याचे उघड झाले.
या रसायनाचा वापर करण्यात येत असल्यामुळे कर्करोग, दमा आदी आजार होणे शक्य असल्याचे डॉक्टरांचे म्हणणे असून, संबंधित लोकांवर कारवाई करण्यात येणार असल्याची माहिती यावेळी देण्यात आली.
वास्को शहरात विकण्यात येत असलेले नीलम आंबे पिकवण्याकरिता त्यात जिवाला हानिकारक असलेल्या रसायनाचा वापर करून ते पिकवण्यात येत असल्याची माहिती मुरगावच्या उपजिल्हाधिकाऱ्यांना मिळताच त्यांनी आज सकाळी याबाबत कारवाई करून अशा प्रकारचे सुमारे दहा टन आंबे जप्त केले. आज सकाळी ११ वाजण्याच्या सुमारास उपजिल्हाधिकारी श्री.लेविन्सन मार्टिन्स यांच्या मार्गदर्शनाखाली वास्को पोलिस पथक, मुरगाव मामलेदार, आरोग्य खात्याचे विकास कुवेलकर इत्यादींनी खारीवाडा येथे असलेले महम्मद नारंगी, अब्दुल वाहब अशा ठोक व्यापाऱ्यांच्या तसेच हजरत माकबोलिया फ्रूटस् नावाच्या एका गोदामावर छापे मारले असता त्यांना येथे सापडलेल्या शेकडो आंब्यांना पिकवण्यासाठी कॅल्शियम कार्बाइड' नावाचे रसायन असलेली पावडर वापरण्यात येत असल्याचे दिसून येताच त्यांनी अन्न व औषध प्रशासनाला याबाबत माहिती देऊन नंतर त्यांच्या उपस्थितीत सदर गोष्टीची चाचणी घेतली. सदर चाचणीच्या दरम्यान खरोखरच या रसायनाचा वापर होत असल्याचे सिद्ध झाले असून रसायनाची पावडर कागदाच्या पुडीत बांधून (मोठ्या संख्येने) आंब्याच्या मधोमध ठेवण्यात येत असल्याचे उघड झाले. यानंतर कारवाईला सुरुवात करून १० टन आंबे तसेच काही मोसंब्या जप्त करण्यात आल्या.
दरम्यान, या प्रकाराबाबत अधिक माहिती घेण्यासाठी अन्न आणि औषध प्रशासन खात्याचे विकास कुवेलकर यांच्याशी संपर्क साधला असता वास्को शहरात विकण्यात येत असलेले नीलम आंबे २४ तासांच्या आत पिकवण्याकरिता रसायन पावडर वापरण्यात येत असल्याचे कळताच आम्ही आज खारीवाडा येथील तीन गोदामांवर छापे टाकले, त्यावेळी सत्य उघडकीस आले, असे ते म्हणाले.
हे रसायन अतिशय धोकादायक असल्याची माहिती कुवेलकर यांनी दिली. सदर रसायन आंब्यात वापरण्यासाठी वेगवेगळ्या "हार्डवेअर' दुकानातून खरेदी केले जाते, अशीही माहिती उपलब्ध झाली आहे, असे कुवेलकर म्हणाले. वास्कोबरोबरच गोव्याच्या अन्य काही भागांमध्ये आंबे व इतर फळे पिकवण्याकरिता या रसायनाचा वापर होत असल्याची माहिती प्राप्त झाल्याचे कुवेलकर यांनी सांगितले. आत्तापर्यंत महम्मद नारंगी, अब्दुल वाहब व रियाज अहमद यांना ताब्यात घेण्यात आल्याची माहिती त्यांनी देऊन अशा प्रकारची कृत्ये करणाऱ्या आणखी लोकांनाही त्वरित ताब्यात घेण्यात येईल, असे ते म्हणाले. हे आरोपी सध्या अन्न व औषध खात्याच्या ताब्यात असून, उद्या त्यांना न्यायालयात रिमांडसाठी हजर करण्यात येणार आहे.
आंब्याबरोबरच इतर काही फळांमध्येही या रसायनांचा वापर करण्यात येत असल्याचे समजल्याचे कुवेलकर व राजाराम पाटील यांनी सांगितले. याबाबतही कारवाई करण्यात येईल, असे त्यांनी सांगितले. आज सकाळी प्रथम दोन गोदामावर छापे मारण्यात आल्यानंतर तिसऱ्या गोदामावर सदर पथक पोचले असता येथे कोणीही नसल्याचे आढळून आले, मात्र गोदामाचा बाजूचा दरवाजा उघडा होता. छापा पडणार असल्याचा सुगावा लागलेल्यांनी तेथून पळ काढल्याचा अंदाज आहे. े उपजिल्हाधिकारी श्री. मार्टिन्स यांनी आज छापे टाकले, त्यावेळी मामलेदार राजेश आजगावकर, वास्को पोलिस उपअधीक्षक महेश गावकर, पोलीस निरीक्षक ब्राज मिनेझीस, अन्न व औषध विभागाचे निरीक्षक राजीव कोरडे, आरोग्य खात्याचे विकास कुवेलकर तसेच इतर अधिकारी उपस्थित होते.

वीज खाते बनले मौत का सौदागर!

पणजी, दि. १६ (प्रतिनिधी): वीज खात्याच्या हलगर्जीपणामुळे मुक्या जनावरांबरोबर आता मनुष्यांचेही हकनाक बळी जाण्याचे प्रकार पेडणे तालुक्यात वाढीस लागले आहेत. या घटनांमुळे आता वीज खात्याची तुलना "मौत का सौदागर' अशीच होऊ लागल्याचे पेडणेवासीयांत बोलते जात आहे. मांद्रे या गावात सावंतवाड्यावरील सौ. सविता ऊर्फ प्रतीक्षा पांडुरंग सावंत या महिलेचा हकनाक बळी गेला. नुकसान भरपाईच्या नावाने काही लाख रुपयांची घोषणा करून व बळी गेलेल्या कुटुंबातील एखाद्या सदस्याला सरकारी नोकरीचे आमिष दाखवून सरकार जनतेच्या जीविताचा जाहीर लिलाव करू पाहते आहे का, असा खडा सवाल सावंतवाड्यावरील ग्रामस्थांनी केला आहे.
वीज पुरवठ्याच्या पायाभूत सुविधांसाठी खात्याकडून वीज बिलांमार्फत प्रत्येक ग्राहकाकडून अतिरिक्त कर आकारला जातो. गेल्या दोन वर्षांपूर्वी हा कर लागू केल्याने कोट्यवधी रुपयांचा हा पैसा सरकारकडून केवळ वीज पुरवठा सुविधा उभारण्यासाठी व वीज पायाभूत सुविधांच्या विकासासाठी खर्च केला जाईल, अशीही घोषणा केली होती. पेडणे तालुक्यातील बहुतांश भागात मात्र कित्येक वर्षांपूर्वीच्या वाहिन्या व वीज खांब अजूनही तिथेच आहेत. ते बदलण्यासाठी इथल्या ग्रामस्थांच्या बळीची वाट तर सरकार पाहत नाही ना, असा सवाल मांद्रे सिटीजन फोरमतर्फे करण्यात आला. यापूर्वी अशाच प्रकारे मोरजी येथे पिता- पुत्राचा नाहक बळी गेला होता. या घटनेच्या स्मृती ताज्या असतानाच दोन लहान मुलांची आई असलेल्या सौ.सविता हिचा बळी गेला. राज्यात मान्सून सुरू झाल्याने वीज खात्याची जबाबदारी वाढते हे ठाऊक असूनही वीजमंत्री आलेक्स सिकेरा हे मात्र युरोप दौऱ्यात व्यस्त आहेत. वीज खात्यातील बहुतांश वरिष्ठ पदांवरील अधिकारी हे राजकीय आश्रयाने सेवावाढीवर आहेत व त्यामुळे त्यांच्याकडून केवळ वीजमंत्र्यांची हुजरेगिरी सुरू असून वीज खात्यात सुधारणा घडवून आणण्यासाठी कुणीच प्रयत्न करीत नाही, अशीही संतप्त भावना वीज खात्यातील काही कर्मचाऱ्यांचीही बनली आहे. ग्राहकांकडून जमा करण्यात आलेला पैसा केवळ आपल्या ठरावीक मतदारसंघातच खर्च करून तिथे भूमिगत वीज वाहिन्या टाकण्याची कंत्राटे दिली आहेत तर अन्य ठिकाणी मात्र विजेच्या सुविधांचा बोजवारा उडाला आहे. ही परिस्थिती अशीच राहिल्यास भविष्यात आणखीनही बळींचे खापर सरकारच्या माथी फुटण्याचीच जास्त शक्यता आहे.
गावातील विजेच्या उपकरणांच्या या परिस्थितीबाबत स्थानिक पंचायतीकडूनही खात्याकडे पाठपुरावा केला जात नाही, याबाबतही काही लोकांनी नाराजी व्यक्त केली. मांद्रेचे आमदार तथा भाजप प्रदेशाध्यक्ष प्रा.लक्ष्मीकांत पार्सेकर यांनी गेल्या विधानसभा अधिवेशनात पेडणे तालुक्यातील व विशेषतः मांद्रे मतदारसंघातील वीज वाहिन्या व खांबांच्या जीर्ण अवस्थेबाबत विषय उपस्थित केला असता त्यांना मंत्र्यांकडून ठोस आश्वासन मिळाले होते पण खाते याप्रकरणी अजिबात गंभीर नसल्यानेच हे प्रकार यापुढे बंद होतीलच याबाबत खात्रीपूर्वक सांगणे कठीण आहे,अशी प्रतिक्रिया प्रा.पार्सेकर यांनी दिली.
----------------------------------------------------------
मंत्री फिरकलेच नाहीत!
कुठे तरी गणपतीची मूर्ती सापडल्याची वार्ता समजताच मुख्यमंत्री दिगंबर कामत हे सरकारचा सर्व कारभार बाजूला टाकून तिथे धाव घेतात, पण आपल्या सरकारच्या निष्क्रियतेमुळे एका महिलेचा जीव गेला तर तिथे भेट देण्याची गरज त्यांना वाटत नाही, हे जनतेचे दुर्दैव आहे, अशी कडवट प्रतिक्रिया येथील काही ग्रामस्थांनी व्यक्त केली. कामत यांच्या अजोड भक्तीपुढे देवांनीही आता जनतेला वाऱ्यावर सोडून केवळ त्यांची खुर्ची वाचवण्यासाठीच आपली ताकद पणाला तर लावली नाही ना, अशीही भावना काही लोकांनी प्रकट केली.

गुरुदास पेडणेकर यांचे निधन

पणजी, दि.१६ (प्रतिनिधी): ज्येष्ठ पत्रकार गुरूदास पेडणेकर यांचे आज सकाळी सुमारे पावणे आठ वाजता ताळगाव येथील त्यांच्या राहत्या घरात अल्प आजाराने निधन झाले. ते ६२ वर्षांचे होते. दै. "नवप्रभा'त त्यांनी अनेक वर्षे मुख्य प्रतिनिधी म्हणून काम पाहिले. १९९१ साली त्यांनी आपल्या पदाचा राजीनामा दिल्यानंतर काही काळ त्यांनी मुक्त पत्रकारिता केली.
विविध सामाजिक, राजकीय विषयांवर त्यांनी शेवटपर्यंत लिखाण केले.त्यांच्या पश्चात पत्नी, दोन मुलगे व एक मुलगी असा परिवार आहे. आज संध्याकाळी ५.३० वाजता सांतिइनेज येथील स्मशानभूमीत त्यांच्यावर अंत्यसंस्कार करण्यात आले. गोवा श्रमिक पत्रकार संघटनेचे (गुज) ते सदस्य होते.

'पंचवाडी खाण प्रकल्पाची आपणास माहितीच नाही'

मुख्यमंत्र्यांच्या अजब पवित्र्याने पंचवाडीवासीय चक्रावले
पणजी, दि.१६ (प्रतिनिधी): पंचवाडीतील नियोजित खनिज प्रकल्पाबाबत आपल्याला कसलीच माहिती नाही, असा पवित्रा मुख्यमंत्री दिगंबर कामत यांनी घेतल्याने पंचवाडीवासीय आज अक्षरक्षः चक्रावूनच गेले. पंचवाडीतील नियोजित खनिज प्रकल्पाला विरोध दर्शवण्यासाठी पंचवाडी बचाव समितीचे शिष्टमंडळ त्यांची भेट घेण्यासाठी गेले असता कामत यांनी हे उद्गार काढले. पंचवाडीवासीयांना नको असेल तर अशा प्रकारचा प्रकल्प गावात अजिबात होणार नाही, असे आश्वासन त्यांनी दिल्याने समितीने समाधान व्यक्त केले आहे.
पंचवाडी बचाव समितीतर्फे आज मुख्यमंत्री दिगंबर कामत यांची आल्तिनो येथील सरकारी निवासस्थानी भेट घेण्यात आली. समितीचे नेते क्रिस्टो डिकॉस्टा, नाझारेथ गुदिन्हो तसेच पंचवाडीचे धर्मगुरू फादर लॉरेन्स रॉड्रिगीस व शिरोड्याचे आमदार महादेव नाईक आदींचा या शिष्टमंडळात समावेश होता. या शिष्टमंडळातर्फे पहिल्यांदाच पंचवाडी गावात विजर खाजन येथे सेझा गोवा कंपनीच्या नियोजित खनिज प्रकल्पाचा विषय उपस्थित झाला. यावेळी कामत यांनी या प्रकल्पाबाबत पूर्णपणे अनभिज्ञता व्यक्त करून शिष्टमंडळालाच पेचात टाकले. खाण मंत्री असूनही या प्रकल्पाची माहिती कामत यांना नसावी ही गोष्ट न पटणारीच होती. त्यामुळे समितीच्या सदस्यांनी या प्रकल्पाची थोडक्यात माहिती कामत यांना दिली. सेझा गोवा कंपनीच्या या प्रकल्पासाठी मोठ्या प्रमाणात शेतजमीन व जैविक समृद्धीने संपन्न असलेला भाग नष्ट होणार आहे. खुद्द सरकारकडूनच सार्वजनिक हिताचे कारण पुढे करून या प्रकल्पासाठी भूसंपादन केल्याचीही गोष्ट त्यांच्या नजरेस आणून दिली. त्यावर, स्थानिकांना नको असल्यास हा प्रकल्प अजिबात होणार नाही, असे मुख्यमंत्री म्हणाले.
दरम्यान, या शिष्टमंडळात सामील झालेले व या आंदोलनामागे ठामपणे उभे राहिलेले पंचवाडीचे धर्मगुरू फादर लॉरेन्स रॉड्रिगीस यांनी मुख्यमंत्री कामत यांना पंचवाडी गावात भेट देऊन ही जागा पाहण्याची विनंती केली व कामत यांनी ती मान्य करून आपण पंचवाडीला भेट देण्याचे मान्य केले.
पंचवाडी हा गाव नैसर्गिक संपत्तीने नटला आहे. शेती व बागायती हा इथल्या भूमिपुत्रांचा महत्त्वाचा व्यवसाय आहे. या गावातील बहुतांश लोक हे अनुसूचित जमातीचे घटक असून इथली नैसर्गिक संपत्ती नष्ट झाल्यास या लोकांवर देशोधडीला लागण्याची वेळ ओढवेल, अशी माहिती आमदार महादेव नाईक यांनी पत्रकारांशी बोलताना दिली.
काही राजकीय नेते व कंपनीचे अधिकारी गावातील लोकांना विविध आमिषे दाखवून त्यांच्यात फूट घालण्याचा प्रयत्न करीत आहेत. एक लोकप्रतिनिधी या नात्याने सत्याची कास धरून पंचवाडी गावचे हित जपणे व या लोकांना या लढ्यात पाठिंबा देणे हे आपले कर्तव्य ठरते. त्यामुळे आपला या आंदोलनाला पूर्ण पाठिंबा असल्याचे आमदार नाईक म्हणाले.
पंचवाडी गावातील शेतकऱ्यांसाठी म्हैसाळ धरणाची निर्मिती करण्यात आली. असे असताना केवळ एका खाजगी खाण कंपनीच्या स्वार्थासाठी या गावचा बळी देण्याचा प्रयत्न केला तर तो कदापि खपवून घेतला जाणार नाही, असा इशारा क्रिस्टो डिकॉस्टा व नाझारेश गुदिन्हो यांनी दिला. पंचवाडीच्या रक्षणासाठी प्राणाची बाजी लावू, असे प्रतिपादन त्यांनी केले.
दरम्यान, या नियोजित प्रकल्पामुळे मोठ्या प्रमाणात खारफुटी नष्ट होणार असल्याने पर्यावरणाच्या दृष्टीनेही हा प्रकल्प हानिकारक ठरणार असल्याचेही सांगण्यात आले.

मडगाव स्फोटांत 'सनातन'चा प्रत्यक्ष सहभाग नाही : 'एनआयए'चा युक्तीवाद

मडगाव, दि. १६ (प्रतिनिधी): दिवाळीच्या पूर्वसंध्येला मडगावात झालेल्या स्फोट प्रकरणी राष्ट्रीय तपास संस्थेने सादर केलेल्या आरोपपत्रासंदर्भात आरोप निश्चित करण्यापूर्वीचे युक्तीवाद आज येथील मुख्य सत्र न्यायाधीश उत्कर्ष बाक्रे यांच्यासमोर सुरु झाले असता खास सरकारी वकिलांनी या स्फोटाशी सनातन संस्थेचा प्रत्यक्ष सहभाग नाही या भूमिकेचा पुनरुच्चार केला.
हे युक्तीवाद परवा शुक्रवारी पुढे चालू रहातील व त्यानंतर सध्या या संस्थेच्या ताब्यात असलेले सनातन संस्थेचे साधक विनय तळेकर, विनायक पाटील व दिलीप माणगावकर यांनी आपली जामिनावर सुटका व्हावी म्हणून केलेल्या अर्जावर न्यायाधीश निवाडा देतील. गेल्या आठवड्यात व्हावयाची ही सुनावणी आजपर्यंत पुढे ढकलण्यात आली हेाती.
आज सकाळी खास सरकारी वकिल ए. फारिया यांनी आपले युक्तिवाद सुरु करताना नरकासूर स्पर्धेला असलेल्या विरोधातून मालगोंडा पाटील व योगेश नाईक हे या कटातील मुख्य संशयित होते, त्यांना रुद्रा पाटील, सारंग अंकलकर व इतरांनी मदत केली,असे सांगितले. १६ ऑक्टोबर २००९ च्या या कटात सनातन संस्थेचा प्रत्यक्ष सहभाग नसला तरी तिचे साधक गुंतलेले आहेत,असे त्यांनी यावेळी प्रतिपादिले.
राष्ट्रीय तपास संस्थेच्यावतीने त्यांनी यापूर्वी गेल्या १७ मे रोजी ३० पानी आरोपपत्र दाखल केलेले असून त्याला सुमारे चार हजार कागदपत्र आधारादाखल जोडलेले आहेत. या प्रकरणी २५० साक्षीदार नोंदले गेलेले आहेत.
ऍड. फारीया यांचे युक्तीवाद आज अपूर्ण राहिले, नंतर पत्रकारांशी बोलताना त्यांनी आपण विनय तळेकर व अन्य दोघांनी जामिनासाठी केलेल्या अर्जाला विरोध केल्याचे सांगितले. तर बचाव पक्षाचे वकिल वकिल संजीव पुनाळेकर यांनी सनातन साधकांना या प्रकरणात मुद्दाम गोवण्यात आल्याचा आरोप केला. त्यापैकी कोणीही फरारी नव्हते तर प्रसारमाध्ममांनी त्यांना लक्ष्य करण्याची मोहीम चालविल्याने ते पुढे येत नव्हते, असे सांगितले.
राष्ट्रीय तपास संस्थेने या प्रकरणी गेल्या १७ मे रोजी सत्र न्यायालयात ११ जणांविरुध्द आरोपपत्र गुदरलेले आहे. त्यातील मालगोंडा पाटील व योगेश नाईक स्फोटात ठार झालेले आहेत तर धनंजय अष्टेकर, जयप्रकाश अण्णा रुद्रा पाटील, सारंग अंकलकर व प्रशांत जुवेकर अजून फरारी आहेत. पाचवा फरारी प्रशांत अष्टेकर यापूर्वीच न्यायालयाला शरण आला असून सध्या तो न्यायालयीन कोठडीत आहे. सुरूवातीस हे प्रकरण प्रथम पोलिसांनी नंतर गुन्हा अन्वेषण विभागाने व त्यानंतर खास तपास पथकाने तपास केला होेता. आता केंद्राच्या निर्णयानुसार ते प्रकरण राष्ट्रीय तपास संस्था हाताळत आहे.

बरेच आढेवेढे घेतल्यावर मंत्री हळर्णकर यांच्याकडे पाशेकोंचीच सर्व खाती

पणजी, दि. १६ (प्रतिनिधी): शेवटच्या क्षणापर्यंत आढेवेढे घेत मुख्यमंत्री दिगंबर कामत यांनी राष्ट्रवादीचे नवनियुक्त मंत्री नीळकंठ हळर्णकर यांना महत्त्वाच्या पर्यटन खात्यासह बंदर कप्तान, गृह निर्माण आदी माजीमंत्री मिकी पाशेको यांच्याकडील सर्व पदे बहाल करून हा विषय अखेर निकालात काढला. गृह निर्माण महामंडळाचे अध्यक्षपदही हळर्णकर यांच्याचकडे ठेवण्यात आले. यासंबंधीची अधिसूचना रात्री उशिरा जारी करण्यात आल्याची खात्रीलायक माहिती मिळाली आहे.
नादिया तोरादो मृत्युप्रकरणी मुख्य संशयित म्हणून घोषित झालेले मिकी पाशेको यांनी आपल्या मंत्रिपदाचा राजीनामा दिल्याने त्याजागी राष्ट्रवादीचे थिवीचे आमदार नीळकंठ हळर्णकर यांची वर्णी लागली होती. श्री. हळर्णकर यांना ८ जून रोजी शपथ देऊनही अद्याप खाती बहाल करण्यात आली नसल्याने काही प्रमाणात सरकाराअंतर्गत धुसफूस सुरू झाली होती. मुळातच मिकी यांच्याकडील पर्यटन खात्यावर मुख्यमंत्री कामत यांच्यासह अनेकांची नजर होती. हे खाते प्राप्त करून श्री. हळर्णकर यांना अन्य कुठले तरी पद देण्याचीही चाचपणी कामत यांनी केल्याची खबर आहे. शेवटी खातेबदलाचा हा प्रयोग आपल्याच अंगलट येईल, याची खात्री पटल्यामुळे त्यांनी पाशेको यांच्याकडील सगळी खाती नीळकंठ हळर्णकर यांच्या पदरात टाकून दोन्ही पक्षांच्या श्रेष्ठींनी दिलेल्या आदेशांचे पालन केले.
हळर्णकर यांना खातेवाटप करताना महामंडळाच्या अध्यक्षपदांबाबत काही फेरफार करण्याचाही निर्णय सरकार दरबारी झाल्याचे ऐकिवात येते. नीळकंठ हळर्णकर यांच्याकडे उत्तर गोवा नियोजन विकास प्राधिकरणाचे अध्यक्षपद होते. अत्यंत महत्त्वाचे समजले जाणारे हे पद कुडतरीचे आमदार आलेक्स रेजिनाल्ड लॉरेन्सो यांना देण्याचे ठरले आहे. रेजिनाल्ड हे कदंब महामंडळाच्या अध्यक्षपदाचा राजीनामा देणार असून हे पद वाहतूकमंत्री सुदिन ढवळीकर यांचे बंधू तथा प्रियोळचे आमदार दीपक ढवळीकर यांना मिळण्याची शक्यता आहे. वाहतूक खाते व कदंब महामंडळ यांच्यावर ही ढवळीकर बंधूंकडे येणार असल्याने त्याचा कितपत फायदा महामंडळाला होतो हे पाहणे आता औत्सुक्याचे ठरणार आहे.
या महामंडळ वाटपात मुख्यमंत्र्यांनी युवक कॉंग्रेसचे प्रदेशाध्यक्ष संकल्प आमोणकर यांचीही सोय लावली आहे. आमोणकर यांच्याकडे गोवा फलोत्पादन महामंडळाचे अध्यक्षपद देण्यात येणार आहे. यापूर्वी हे पद माजी युवाध्यक्ष गिरीश चोडणकर यांच्याकडेही होते. आमोणकर यांना गृह निर्माण महामंडळाचे अध्यक्षपद मिळवण्यासाठी अनेकांनी प्रयत्न केले होते; पण त्यास हळर्णकर यांनी हरकत घेतल्याने अखेर फलोत्पादनावरच समाधान मानणे युवा कॉंग्रेससाठी अनिवार्य ठरले.
--------------------------------------------------------
पर्यटन विकास महामंडळाचे संचालक मंडळ बरखास्त!
माजी मंत्री मिकी पाशेको यांनी नियुक्त केलेल्या पर्यटन विकास महामंडळाचे संचालक मंडळ बरखास्त करण्याचा निर्णय सरकारने घेतला आहे. या महामंडळाचे अध्यक्षपद मात्र कुडचडेचे आमदार श्याम सातार्डेकर यांच्याकडेच राहणार आहे. संचालक मंडळ बरखास्त केल्याने लिंडन मोंतेरो यांच्याकडील उपाध्यक्षपद रद्द झाले आहे. आता या पदावर राष्ट्रवादीच्या अन्य एका नेत्याची नियुक्ती होईल, अशी माहिती हाती आली आहे. या पदासाठी राष्ट्रवादीच्या पदाधिकाऱ्यांत जोरदार चढाओढ असल्याचेही सांगितले जात आहे.

जिवंत वाहिन्या कोसळून मांद्रेत महिला मृत्युमुखी

वीज खात्याच्या बेपर्वाईचा कळस
पेडणे, दि. १५ (प्रतिनिधी): वीज खात्याच्या हलगर्जीपणामुळे जीर्णावस्थेतील दोन जिवंत वीजवाहिन्या कोसळून सावंतवाडा मांद्रे येथील सौ. सविता उर्फ प्रतीक्षा पांडुरंग सावंत (वय ३३) या विवाहितेला आज पहाटे ५.३० वाजण्याच्या सुमारास
आपला जीव गमवावा लागला.
वीज खात्याच्या हलगर्जीपणाचा हा जणू कळसच ठरला आहे. गेल्या वर्षी गेल्या वर्षी मोरजी येथे याच प्रकारे जिवंत वीजवाहिन्या कोसळून पिता-पुत्राचा दुर्दैवी अंत झाला होता. त्यानंतर ही दुसरी गंभीर घटना घडली आहे. सुमारे २५ वर्षांपूर्वी घातलेल्या वीजवाहिन्या अत्यंत जुनाट झाल्या होत्या. ठिकठिकाणी त्या जोडण्यात आल्या आहेत.
सावंतवाडा येथील जीर्ण वीजवाहिन्या बदलाव्यात म्हणून कित्येक वर्षांपासून लोक मागणी करत आहेत; तथापि, आजपर्यंत त्याची दखल घेण्यात आलेली नाही. याच बेपर्वाईचाच बळी ठरल्या त्या सविता सावंत. लोकांनी यासंदर्भात केलेल्या तक्रारींचे कागदसुद्धा असेच जीर्ण झाले आहेत.
तब्ब्ल पाच तासांनी मृतदेह हलवला
वीज खात्याच्या या भोंगळ कारभारामुळे खवळलेल्या नागरिकांनी जोपर्यंत मंत्री, वीज अभियंते यांनी येथे येऊन ठोस आश्वासन देईपर्यंत सविता यांचा मृतदेह हलवणार नाही अशी भूमिका घेतली. पहाटे ५.३० वा. सविता मरण पावली व तिचा मृतदेह सकाळी १० वाजता हलवण्यात आला. सविता ही पहाटे घराच्या बाजूलाच आपल्या दैनदिन कामासाठी पहाटे ५.३० वाजता गेली असता तेथे दोन जिवंत वीजवाहिन्या तुटून विहीरीच्या बाजूला पडल्या होत्या. त्याचा तिला स्पर्श झाला. एका वीज वाहिनीने तर तिच्या शरीरालाच विळखा घातला होता.
त्या धक्क्याने सविता एवढ्या मोठ्याने किंचाळली की, सारा वाडाच जागा झाला. तिचे पती पांडुंरग धावतच घटनास्थळी गेले आणि तिला पकडणार तेव्हा जवळच्या लोकांनी त्यांना खेचून त्वरित बाजूला नेले. अन्यथा भयंकर दुर्घटना घडली असती.
या घटनेची माहिती तातडीने पेडणे पोलिसांना देण्यात आली. मात्र ते दोन तासांनी तेथे पोहोचले. स्थानिक वीज कर्मचाऱ्यांचा तर पत्ताच नव्हता. तब्बल तीन तासांनी वीज अभियंता श्री. शिरूर, म्हापशाचे अभियंते उल्हास केरकर घटनास्थळी हजर झाले. त्यापूर्वी संतप्त जमावाने श्री. म्हापसेकर या वीज हेल्परला मारहाण केली. एवढेच नव्हे तर तेथील संतप्त जमावाने वीज अभियंते व पोलिसांनाही फैलावर घेतले. वीज कर्मचारी मांद्रे विभागात ग्राहकांचा फोनही घेत नाही. ते स्कूटरने येतात व रस्त्यावरून वीजवाहिन्या बघतात. गाडीवरून उतरण्याची तसदीही घेत नाहीत. पूर्वीचे लाईनमन वेळेवर यायचे व काम करायचे. आता लाईनमनच नव्हे तर केवळ हेल्परच असतात अशी लोकांची तक्रार आहे.
संतप्त नागरिकांनी जोपर्यंत अभियंते ठोस आश्वासन देत नाहीत, तोपर्यंत मृतदेह हलवणार नाही. किमान दहा लाख रुपये नुकसानी किंवा दोन लाख नुकसान भरपाई व तिच्या नवऱ्याला शासकीय नोकरीत सामावून घ्या अशा मागण्या केल्या. मात्र कोणत्याच मागणीवर अभियंत्यांनी लेखी स्वरूपात आश्वासन दिले नाही.
मिलिंद देसाईंना आणा
मांद्रे वीज विभागात मांद्रे येथील कर्तव्यदक्ष कनिष्ठ अभियंते मिलिंद देसाई यांना या भागात त्वरित आणा अशी मागणी लोकांनी केली आहे. तुटलेल्या वीजवाहिन्यांवर कोणतेही झाड किंवा फांदी पडली नव्हती. आमदार लक्ष्मीकांत पार्सेकर यांनी सांगितले की, वीज खात्याच्या हलगर्जीपणामुळे पूर्वी जनावरे मरायची. आता माणसे वीज वाहिन्याला स्पर्श होऊन मरू लागतात. तरीही वीजमंत्र्यांना जाग येत नाही. आपण या घटनेचा वीज खात्याच्या तीव्र शब्दांत निषेध करीत आहोत. सदर कुटुंबाला कमाल शासकीय मदत मिळवून देण्याचा प्रयत्न आपण करणार आहोत.
वीज अभियंता शिरूर यांनी सावंतवाडा मांद्रेे येथील ज्या जीर्ण वीजवाहिन्या तातडीने बदलण्याचे आश्वासन देताना आजपासून कामाला सुरुवात करणार असल्याचे सांगितले.
दरम्यान, घटनास्थळी कायदा सुव्यस्था बिघडू नये म्हणून पेडणे पोलिस निरीक्षक उत्तम राऊत देसाई, उपनिरीक्षक दत्ताराम राऊत आपल्या फौजफाट्यासह हजर होते.
सरपंच महेश कोनाडकर, पंच राघोबा गावडे, माजी जिल्हा पंचायत सदस्य श्रीधर मांजरेकर, देऊ सावंत, नामदेव सावंत, आबा सावंत आदींनी सावंत कुटुंबीयांचे सांत्वन केले. पाच तासांनंतर मृतदेह बांबोळी येथे चिकित्सेसाठी पाठवण्यात आला.
-------------------------------------------------------
'आई आता कधीच परत येणार नाही'
एक मुलगा व एक मुलगी या दोन दोन छकुल्यांना पोरके करून सविता पांडुरंग सावंत देवाघरी गेल्या. "आता आपली आई कधीच परत येणार नाही,' हे या चिमुकल्यांना कोण सांगणार? त्यांच्या कुटुंबावर आणि या परिसरावर दुःखाचा डोंगरच कोसळला आहे. सावंतवाड्यात तर सविताचा असा हकनाक मृत्यू झाल्याचे वृत्त कानी पडताच अनेक महिलांनी हंबरडा फोडला.

स्मृती इराणी भाजपच्या महिला शाखा अध्यक्ष

नवी दिल्ली, दि. १५ : "क्योंकी सास भी...' या अत्यंत गाजलेल्या मालिकेमुळे जनतेच्या गळ्यातील ताईत बनलेल्या अभिनेत्री तथा राजकीय नेत्या सौ. स्मृती इराणी यांनी निवड भारती जनता पक्षाच्या महिला शाखेच्या अध्यक्षपदी करण्यात आली आहे. तसेच हिमाचल प्रदेशचे मुख्यमंत्री प्रेमकुमार धुमल यांचे सुपुत्र तथा खासदार अनुराग ठाकूर यांची नियुक्ती भाजपच्या युवा शाखेचे राष्ट्रीय अध्यक्ष म्हणून करण्यात आली आहे. पक्षाध्यक्ष नितीन गडकरी यांनी आज येथे भरगच्च पत्रपरिषदेत याविषयीच्या घोषणा केल्या.
वीस सदस्यीय केंद्रीय निवडणूक समिती, पाच सदस्यांची शिस्तपालन समिती आणि अल्पसंख्याक, किसान, अनुसूचित जाती व जमाती या पक्षातील अन्य विभागांचे प्रमुख या नावांच्या घोषणाही श्री. गडकरी यांनी केल्या. सौ. इराणी यांनी आपण पक्षकार्यासाठी जास्तीत जास्त वेळ देऊन आपल्यावर सोपवण्यात आलेल्या जबाबदारीला न्याय देण्याचा सर्वतोपरी प्रयत्न करणार असल्याचे सांगितले. त्याचप्रमाणे अनुराग ठाकूर यांनीही हिमाचल प्रदेशात विकासकामांचा धडाका लावून आदर्शवत काम केले आहे. त्यांनी सांगितले की, पक्षाच्या युवा शाखेत नवचैतन्य आणण्यासाठी आपण वचनबद्ध आहोत.

तोतया 'सीआयडी'ना साथ 'तोतया' पत्रकाराची!

टोळीच्या कारवायांचा पर्दाफाश
पणजी, दि. १५ (प्रतिनिधी): केंद्रीय गुन्हा अन्वेषण विभागाचे पोलिस अधिकारी असल्याचे सांगून गोव्यातील लोकांना लुटणाऱ्या दोन तोतयांना गोवा पोलिसांच्या गुन्हा अन्वेषण विभागाने गेल्या दोन आठवड्यांपूर्वी अटक केली असतानाच आता या टोळीचा सूत्रधार म्हणून वावरत असलेल्या एका तोतया पत्रकारालाही अटक करून पोलिसांनी या टोळीचाच पर्दाफाश केला आहे.
आपण एका राष्ट्रीय वृत्तपत्राचे पत्रकार आहोत असे सांगून अनेकांशी संबंध जोडणे व तोतया केंद्रीय गुन्हा अन्वेषण विभागाच्या अधिकाऱ्यांकरवी त्यांना गंडवणे असाच धंदा या टोळीचा होता, अशीही माहिती मिळाली आहे. तोतया अधिकाऱ्यांच्या चौकशीत पोलिसांना या तोतया पत्रकाराची माहिती मिळाली व त्यानुसार आज संध्याकाळी पोलिसांनी शापोरा येथे सदर तोतया पत्रकाराच्या घरावर छापा टाकून त्याला ताब्यात घेतले. सदर तोतया पत्रकाराचे नाव उमेश सातार्डेकर असल्याची माहितीही पोलिस सूत्रांनी दिली असून तो स्थानिक आहे, अशीही खबर मिळाली आहे. दरम्यान, गुन्हा अन्वेषण विभागाने गेल्या दोन आठवड्यांपूर्वी तोतया अधिकाऱ्यांना म्हापसा येथे सापळा रचून पकडले होते व त्यावेळी हा तोतया पत्रकार त्यावेळी तिथे हजर होता, असे पोलिसांच्या आता लक्षात आले आहे.
मोहमद शकील व हित्तगिरी हे सध्या गुन्हा अन्वेषण विभागाच्या ताब्यात असून ते दोघेही कोल्हापूर इचलकरंजी येथे राहणारे आहेत. या छाप्यात पोलिस निरीक्षक प्रवीणकुमार वस्त, उपनिरीक्षक निनाद देऊलकर आदींचा समावेश होता.

नगरगावातील महिलांची पुरवठा खात्यावर धडक

'एपीएल' कार्डधारकांना फक्त दीड किलो तांदूळ
पणजी, दि. १५ (प्रतिनिधी): मुख्यमंत्री दिगंबर कामत यांच्या "आम आदमी' च्या राजवटीत सामान्य जनता आता अन्नालाही मोताद झाली आहे. दारिद्र्‌यरेषेवरील रेशनकार्डधारकांना ("एपीएल' - अबाव पॉवर्टी लाईन) प्रति रेशनकार्ड दहा किलो तांदूळ देण्याची तरतूद असतानाही केवळ दीड किलो तांदूळ देऊन त्यांची परवड सुरू असल्याची लेखी तक्रार नगरगाव पंचायत क्षेत्रातील महिलांनी नागरी पुरवठा संचालकांकडे केली आहे.
सत्तरी तालुक्यातील नगरगाव पंचायत क्षेत्रातील महिलांच्या एका शिष्टमंडळाने आज नागरी पुरवठा संचालक श्री. पिळर्णकर यांची भेट घेतली. नगरगाव पंचायतीत "एपीएल' कार्डधारकांना केवळ दीड किलो तांदूळ मिळतात. याप्रकरणी इथल्या स्वस्त धान्य दुकानदारांना जाब विचारला तर कोटा पोहोचला नाही, असे कारण सांगून लोकांना परत पाठवले जाते, अशी तक्रार या महिलांनी केली आहे. तेथील ग्रामस्थ "एपीएल' गटात जरी असले तरी त्यांची आर्थिक परिस्थिती अत्यंत बेताची आहे. त्यामुळे दीड किलो तांदूळ हे त्यांना एका दिवसासाठीही पुरणारे नाहीत,अशी प्रतिक्रिया राजश्री राघोबा शेळापकर यांनी व्यक्त केली.
"एपीएल' कार्डधारकांना मिळणारा कोटा म्हणजे जणू जनतेची चेष्टाच ठरला आहे. त्याद्वारे कुटुंबाच्या जेवणाची गरज भागू शकत नाही. प्रति कार्डधारकांना १० किलो ऐवजी ३५ किलो तांदूळ प्रति महिना मिळायलाच हवा. हा तांदूळ ९ रुपये प्रतिकिलो ऐवजी किमान ६ रुपये प्रतिकिलो दराने उपलब्ध करावेत, असेही त्या म्हणाल्या.
हा प्रकार केवळ नगरगावच नव्हे तर संपूर्ण सत्तरी तालुक्यात चालतो.आपल्यावरील अन्यायाविरोधात पेटून उठण्याचे धाडसच सत्तरीवासीय घालवून बसले आहेत. "एपीएल' कार्डधारकाला प्रतिमहिना १० किलो तांदूळ मिळणे हा त्यांचा हक्क आहे पण तो हिरावून घेतला जात आहे. नगरगाववासीयांनी उघडपणे या अन्यायाला वाचा फोडण्याचे धाडस केले. राज्यातील इतर भागातही अशाच प्रकारचा अन्याय सुरू असल्याने या लोकांनीही नगरगाववासीयांना पाठिंबा द्यावा व स्वतःला आम आदमीचे सरकार म्हणवून मिरवणाऱ्या या सरकारला जाब विचारावा, असे आवाहनही त्यांनी यावेळी केले.
राजधानीत मोठमोठ्या कलाकारांबरोबर महोत्सव साजरे करणाऱ्या मुख्यमंत्र्यांनी ग्रामीण भागातील जनतेच्या समस्या व अडचणी समजून घेण्यासाठीही आपला थोडा वेळ खर्ची घालावा. महोत्सवाच्या नावाखाली कोट्यवधी रुपयांची उधळण करताना जनतेला कमी दरात अन्नधान्य देण्यासाठीही काही पैसे शिल्लक ठेवाल तर लोक दुवा देतील, असा टोलाही लोकांनी हाणला.