संपुआ व डाव्यांकडून आजचे मरण उद्यावर!

मुद्दा अणुकराराचा
नवी दिल्ली, दि. 25 - अणुकराराच्या महत्त्वपूर्ण मुद्यावर कोणताही ठोस निर्णय न घेता संयुक्त पुरोगमी आघाडी व डावे पक्ष यांनी आजचे मरण उद्यावर ढकलले आहे. उभय पक्षांत आज चर्चा झाली, पण त्यात काहीही निर्णायक घडले नाही. "या मुद्यावर नंतर लवकरच भेटू', असे दोन्हीकडील नेत्यांनी परस्परांना सांगत बैठक आवरती घेतली.
या बैठकीत कोणता निर्णय होतो याकडे केवळ देशवासीयांचेच नव्हे, तर अमेरिकेचेही डोळे लागले होते. तथापि, अणुकराराचा विविध दृष्टिकोनातून आढावा घेतल्यानंतर जेव्हा मोक्याची वेळ आली तेव्हा दोन्ही पक्षांनी पुन्हा लवकरच भेटण्याचे ठरवले. त्यामुळे डाव्यांना दणका देऊन केंद्र सरकार पुढचे पाऊल उचलणार काय, या मूलभूत प्रश्नाचे उत्तर अजून गुलदस्त्यातच राहिले आहे.विविध वाहिन्यांनी जणू केंद्रातील सरकार आजच कोसळणार, डावे पक्ष केंद्राचा पाठिंबा काढून घेणार, परराष्ट्र मंत्री प्रणव मुखर्जी व पंतप्रधान डॉ. मनमोहनसिंग यांची भेट व चर्चा निर्णायक ठरणार, असे वातावरण निर्माण केले होते. प्रत्यक्षात यापैकी काहीच घडले नाही.
मार्क्सवादी कम्युनिस्ट पक्षाचे सरचिटणीस प्रकाश करात यांनी समाजवादी पक्षाचे सर्वेसर्वा मुलायमसिंग यादव यांची भेट घेतल्यानंतर या प्रश्नासंबंधीच्या घडामोडींना गती आली होती. जणू तिसऱ्या आघाडीच्या स्थापनेची प्राथमिक बोलणी सुरू झाल्यासारखे दृश्य निर्माण केले गेले. मात्र, प्रत्यक्षात डावे पक्ष आणि "संपुआ'तील घटक पक्ष यांनी तूर्त सबुरीचे धोरण अवलंबले आहे. आज झालेल्या या महत्त्वपूर्ण बैठकीला अर्थमंत्री पी. चिदंबरम, संरक्षणमंत्री ए. के. अँटनी, रेल्वेमंत्री लालूप्रसाद यादव, विज्ञान व तंत्रज्ञान मंत्री कपिल सिब्बल, नौकानयन मंत्री टी. आर. बालू यांच्याखेरीज डाव्या पक्षांचे नेते प्रकाश करात, ए. बी. वर्धन, डी. राजा, सीताराम येच्युरी, क्रांतिकारी समाजवादी पक्षाचे नेते टी. जे. चंद्रचूडन, फॉरवर्ड ब्लॉकचे देवव्रत विश्वास उपस्थित होते. 1983 मधील भारतीय क्रिकेट संघाच्या सत्कारासाठी केंद्रीय कृषिमंत्री शरद पवार सध्या लंडनमध्ये असल्यामुळे ते या बैठकीला उपस्थित राहू शकले नाहीत.

"सेझ' बांधकामांवरील बंदी सरकारने उठवली

कंपन्यांना नव्याने "कारणे दाखवा' नोटीसा बजावणार
पणजी, दि. 25 (प्रतिनिधी) - सेझ प्रकल्पांतर्गत कंपन्यांना नव्याने कारणे दाखवा नोटीसा बजावल्या जाणार असून तूर्तास सेझ बांधकामांवरील बंदी उठवली जात असल्याचे राज्य सरकारने न्यायालयात सांगितल्याने मुबई उच्च न्यायालयाच्या गोवा खंटपीठाने के. रहेजा इन्फ्रास्ट्रक्चर प्रा. लिमिटेड व पेन्सुला या कंपन्यांच्या याचिका आज निकाली काढल्या. सरकारने न्यायालयात घेतलेल्या या भुमिकेमुळे मात्र सेझ विरोधी आंदोलकांमध्ये चांगलीच अस्वस्थता निर्माण झाली आहे. दरम्यान, बांधकामांवरील बंदी उठवण्याच्या सरकारच्या भूमिकेमुळे सेझ प्रकल्पांना स्वतःच्या जबाबदारीवर काही काळापुरते तरी रान मोकळे झाले आहे.
आम्हाला आमच्या प्रकल्पाचे बांधकाम करायचे आहे, असे रहेजा कंपनीने न्यायालयात सांगितले असता, तुम्ही तुमच्या जोखमीवर बांधकाम करू शकता, परंतु मूळ याचिकेच्या अंतिम निवाड्यावर त्या बांधकामाचे भवितव्य अवलंबून असेल असेही खंडपीठाने यावेळी स्पष्ट केले.
राज्य सरकारने आम्हाला "कारणे दाखवा' नोटीस न बजावताच थेट काम बंद ठेवण्याचा आदेश देण्यात दिल्याचा मुद्दा संबंधित कंपन्यांनी न्यायालयात मांडला. त्यावेळी सरकारने आम्ही 26 डिसेंबर 07 रोजी प्रादेशिक आराखडा बैठकीवेळी या सर्व कंपन्यांना बोलावले होते. त्यावेळी त्यांना गोव्यात सेझ प्रकल्पांना जनतेचा विरोध होत असल्याने या प्रकल्पांना दिलेली परवानगी मागे घेत असल्याचे सांगितले होते, असे सरकारतर्फे स्पष्ट करण्यात आले.
त्यानंतर 10 जानेवारी 08 रोजी गोवा सरकारने के. रहेजा व पेन्सुला या अधिसूचित करण्यात आलेल्या सेझ प्रकल्पांना बांधकाम बंद ठेवण्याची नोटीस बजावली होती. तेव्हा राज्य सरकारला तसा अधिकार नसल्याचा दावा करून सरकारच्या विरोधात या दोन्ही कंपन्यांनी खंडपीठात याचिका दाखल केली होती. सेझप्रश्नी केवळ केंद्र सरकार निर्णय घेऊ शकते आणि यापूर्वी केंद्रानेचे सेझ प्रकल्प अधिसूचित केले असल्याने राज्य सरकार आम्हाला बांधकाम करण्यापासून अडवू शकत नसल्याचा दावा यावेळी सेझ कंपन्यांच्या वकिलांनी न्यायालयात केला.
सेझ प्रकल्पासाठी लागणाऱ्या जागा राज्य सरकार उपलब्ध करून देते तर , त्या अधिसूचित केंद्र सरकार करते. त्यामुळे या प्रकल्पांना देण्यात आलेली जागा अजूनही राज्य सरकारच्या ताब्यात आहेत. त्याचप्रमाणे 12 मे 08 रोजी केंद्र सरकारने मेटाटॅब, पेन्सुला, के. रहेजा हे अधिसूचित करण्यात आलेले सेझ प्रकल्प रद्द करता येणार नसल्याचा निर्णय अंतिम नाही, असा युक्तिवाद यावेळी सरकारचे वकील रणजीत कुमार यांनी केला.
दरम्यान, औद्योगिक विकास महामंडळातर्फे सर्व सात सेझ प्रकल्पांना दिलेले भूखंड पुन्हा ताब्यात घेण्यासाठी नोटीस बजावण्यात आली होती. तसेच त्या नोटिशीला उत्तर देण्यासाठी सात दिवसाची मुदत देण्यात आली होती. या नोटिसांना केवळ के. रहेजा कंपनीने उत्तर न देता, नोटीसीला आव्हान देणारी याचिका दाखल केली होती. महामंडळाच्या त्या नोटिशीला आज न्यायालयाने स्थगिती दिली. यावेळी रहेजा या कंपनीने बांधकाम सुरु करण्याची परवानगी मागितली असता, तुम्ही तुमच्या जोखमीवर बांधकाम सुरू करू शकता, असे न्यायालयाने नमूद केले आहे. या विषयीची पुढील सुनावणी येत्या 18 जुलै रोजी होईल.

हत्तींना रोखण्यासाठी कायमस्वरूपी योजना

पणजी, दि. 25 (प्रतिनिधी)- गोव्यात रानटी हत्तींनी मांडलेला उच्छाद थोपवण्यासाठी वन खात्यातर्फे कायमस्वरूपी योजना आखण्यात येत आहे. मूळ कर्नाटकातील हत्ती महाराष्ट्रामार्गे गोव्यात दाखल होत असल्याने त्यांना परत कर्नाटकात पाठवण्यासाठी महाराष्ट्र व गोव्याने एकत्रित मोहीम हाती घेण्याचा निर्णय केल्याची माहिती कार्यवाहू मुख्य वनसंरक्षक सी. ए. रेड्डी यांनी दिली.
गोव्याचे मुख्य वनसंरक्षक ओंकारसिंग यांची बदली झाल्याने या महिन्याच्या 16 तारखेला कार्यवाहू म्हणून ताबा घेतलेले श्री. रेड्डी हे यापूर्वी रानटी हत्तींचा संचार असलेल्या भागात काम करून आलेले अधिकारी आहेत. त्यामुळे या विषयातील दांडगा अनुभव व कार्यशैली सरकारला उपयुक्त ठरणार आहे. वन खात्याच्या पूर्व अनुभवानुसार आता हत्तींना परतवण्यासाठी नवी आखणी करण्यात आली आहे. हत्तींच्या हालचालींची व त्यांच्या वागणुकीची पूर्ण जाणीव असलेले तसेच हत्तींचा वास, आवाज, पावलांच्या खुणा आदींवरून हत्तींचा मागोवा घेणारे "कवाडी' कर्नाटकातून मागवण्यात आले आहेत. येत्या दोन दिवसांत तीन ते चार "कवाडी' गोव्यात दाखल होणार असल्याचे श्री. रेड्डी म्हणाले. कर्नाटकातील जंगली भागात ही जमात राहते. हत्तींच्या बंदोबस्तासाठी कर्नाटक सरकारने त्यांना सरकारी सेवेत सामील करून घेण्यात आले आहे. हे कवाडी हत्तींचा मागोवा घेणार असून हत्ती नक्की कुठे असतात याचा शोध ते घेणार आहेत. त्यानंतर काही खास माहुतही मागवण्यात येणार आहेत.
हत्तींच्या हालचालींवर वनरक्षकांचे कायमस्वरूपी लक्ष असून चोवीस तास हे लोक कामावर आहेत. गोव्यातील हत्तींच्या प्रकरणाचा सखोल अभ्यास रेड्डी यांनी केला आहे. त्यांनी वनरक्षक व वनाधिकारी यांच्या धाडसाचे कौतुक केले. गोव्यात रानटी हत्ती हा नवीन अनुभव असल्याने हत्तींमुळे हैराण झालेल्या लोकांनी याबाबत वन खात्याला दोषी ठरवून हे खाते निष्क्रिय किंवा हतबल झाल्याचा समज करून घेऊ नये. हत्तींचा सामना करण्यासाठी कोणतेही हत्यार किंवा तत्सम वस्तू हातात घेऊन हत्तींना जिवंत मारता येत नाही हे लक्षात घेणे आवश्यक आहे. हत्ती हा अतिशय चतुर व ताकदवान प्राणी आहे. एकदा जर माणूस त्याच्या वाटेला गेला तर त्याचा माग धरून त्या माणसाला इजा करण्याची या प्राण्याला सवय आहे. हळर्ण येथे घडलेली घटना व त्यात वनरक्षक राजेंद्र भगत याचा प्राण गेला ही अत्यंत दुर्दैवी घटना असल्याचे सांगून त्या दिवशी स्थानिक लोकांनी वनरक्षकांवर बाहेर पडण्याचे दडपण आणल्याने त्यांना तिथे जाणे भाग पडल्याचे रेड्डी म्हणाले.
एकदा का हत्ती चवताळला तर तो बेफामपणे मागे धावतो व त्यात कोणाचा जीव जाईल याचा पत्ता लागणे कठीण असते. स्थानिक लोक खास करून महिला व लहान मुले ज्याप्रमाणे वनअधिकाऱ्यांना आपली सेवा बजावताना त्रास करतात त्यावर स्थानिक पंचायत सदस्यांनी नियंत्रण ठेवण्याची गरज आहे. शेवटी हत्ती हे प्राणी असल्याने त्यांच्याकडून हल्ला झाल्यास मुळात हत्तीपेक्षा या लोकांना वाचवणे कठीण बनण्याची परिस्थिती उद्भवत असल्याची माहितीही त्यांनी यावेळी दिली.
पुढील महिन्यात गोवा व महाराष्ट्र सरकारच्या वन खात्याची वरिष्ठ पातळीवर बोलणी होणार आहे. गोव्यातील एकूण परिस्थिती व हत्तींमुळे उद्भवलेली परिस्थिती याबाबत केंद्रीय वन खात्यालाही पत्र पाठवण्यात आले असून जीवितहानी टाळण्यासाठी काही उपाययोजना हाती घेण्याची परवानगी मागवली आहे. दरम्यान, हत्तींना सीमेवर रोखण्यासाठी "इपीटी' (एलिफंट प्रूफ ट्रेन्च) व (सोलर फेन्सींग) आदींबाबतही विचार सुरू आहे. महाराष्ट्रातून नक्की कोणत्या मार्गाने हत्ती गोव्यात दाखल होतात या ठिकाणांचा शोध लावून या ठिकाणी ही यंत्रणा बसवण्यात येणार आहे. यापुढे हत्ती महाराष्ट्रात पाठवले तरी ते नक्की महाराष्ट्रात कुठे आहेत व गोव्यात प्रवेश करण्याची शक्यता आहे की काय याचा मागोवा नियमित घेण्यासाठी त्या भागातही वनरक्षकांची नेमणूक करण्याचा प्रस्ताव असल्याची माहिती त्यांनी दिली.
तात्काळ भरपाई देणार
हत्तींनी मांडलेल्या उच्छादामुळे शेतकऱ्यांना झालेले नुकसान ताबडतोब देण्याची प्रक्रिया युद्धपातळीवर सुरू असल्याची माहिती रेड्डी यांनी दिली. गेल्या काही वर्षापूर्वीची प्रलंबित नुकसान भरपाई पुढील आठवड्यापर्यंत लोकांना वितरित केली जाणार आहे. यात बार्देश तालुक्यातील एकूण 25 शेतकऱ्यांचा समावेश आहे. या अर्जांची रक्कम मुळात 67,700 रुपये होत असली तरी वन खात्यातर्फे सुधारीत रकमेचा फायदा या लोकांना देण्यासाठी अतिरिक्त 85,900 रुपयांची मागणी सरकारकडे करण्यात आली आहे. सरकारकडे आत्तापर्यंत एकूण 153 अर्ज सादर झाले आहेत व त्यांची छाननी सुरू आहे. गेल्या तीन वर्षांत हत्तींना परत पाठवण्यापासून ते लोकांना नुकसानभरपाई देण्यावर सुमारे 16 लाख रुपये खर्च झाल्याची माहितीही रेड्डी यांनी दिली.

सेवेसाठी तत्पर
हत्तींचा संचार सुरू असलेल्या भागातील लोकांनी सबुरीने वागावे, असे आवाहन वन खात्याने केले आहे. हत्तींचा मागोवा विनाकारण घेतल्यास, तेथे गर्दी केल्यास वा त्यांना निष्कारण त्रास दिल्यास ते चवताळू शकतात. एखाद्या भागात हत्ती आल्यास किंवा त्यांना कोणी पाहिल्यास ताबडतोब त्याबाबतची माहिती उपवनसंरक्षक एम. के. शंभू (9422437137), साहाय्यक वनसंरक्षक अनिल शेटगावकर(9822587607) साहाय्यक वनसंरक्षक श्री. हेन्रीक (9822137445 व 9423061700) यांना द्यावी.

'अणुकरार' की 'मध्यावधी' निर्णय लवकरच

नवी दिल्लीत वेगवान राजकीय घडामोडी
डावे पक्ष व संपुआ यांची आज बैठक
नवी दिल्ली, दि.२४ : अमेरिकेचा दबाव आणि डाव्यांचा विरोध यात अडकलेल्या अणुकराराचे भवितव्य ठरविणारी डावे आणि संपुआच्या समन्वय समितीची "आर-पार'ची बैठक उद्या बुधवारी होत आहे. डाव्यांचा विरोध झुगारून अणुकरार करायचा किंवा राजीनामा देऊन लोकसभेच्या मध्यावधी निवडणुका घ्यायच्या हा एकमेव पर्याय सध्या पंतप्रधान डॉ. मनमोहनसिंग यांच्यापुढे उपलब्ध आहे. या पार्श्वभूमीवर उद्याच्या बैठकीत पंतप्रधान काय निर्णय घेतात याकडे भारतासोबतच अमेरिकेचेही लक्ष लागले आहे.
सरकारने कराराच्या दिशेने एक पाऊल जरी पुढे टाकले तरी त्याचक्षणी पाठिंबा काढण्यात येईल, असा डाव्यांचा इशारा असल्याने कराराच्या दिशेने वाटचाल करण्याचे धाडस सरकार अजूनही दाखवू शकले नाही. पण, हीच बाब पंतप्रधान डॉ. मनमोहनसिंग यांची झोप उडविणारी ठरली आहे. कारण, त्यांनी या करारात आपली संपूर्ण प्रतिष्ठा पणाला लावली आहे. आता तर त्यांनी पंतप्रधानपदाचा राजीनामा देण्याचीही तयारी केली आहे.
उद्या डावे-संपुआ यांच्यातील बैठक निर्णायक आणि कदाचित शेवटचीही ठरण्याची शक्यता आहे. याच बैठकीत "सरकार की करार' हा निर्णय होणार आहे. तथापि, तो लगेच जाहीर करण्यात येणार नाही.
समाजवादी पार्टीशी जवळीक साधण्याचे कॉंगे्रसचेे प्रयत्न असले तरी आठ प्रादेशिक पक्षांच्या आघाडीच्या मंजुरीशिवाय सपाला कुठलाच निर्णय घेणे शक्य नाही. सपा आणि डावे पक्ष एकत्र येऊन देशात तिसरी आघाडी स्थापन करण्याच्याही प्रयत्नात आहेत. लोकसभा निवडणूक जवळच असताना कॉंगे्रस की डावे यात निवड करणे देखील सपाला जड जात आहे. एकूणच, सरकारची संपूर्ण मदार सध्यातरी डाव्यांवरच आहे. त्यांचा अनादर करून जर सरकारने अणुकराराच्या दिशेने पाऊल उचलले तर सरकार जाणार याची जाणीव कॉंगे्रसला पुरती झालेली आहे.
माकपचे ज्येष्ठ नेते ज्योती बसू यांनी तर कॉंगे्रसला अतिशय कडक शब्दात बजावले आहे. महागाईने १३ वर्षांतील विक्रम मोडित काढला असताना सरकार अडचणीत आणण्याचा शहाणपणा कशासाठी करायचा? अमेरिकेविषयी इतकेच प्रेम असेल तर सत्तेचा मोह सोडा, असे बसू यांनी कळविले आहे.
करार आणि डावे दोघेही हवे
दरम्यान, कॉंगे्रसने मात्र आम्हाला करारही हवा आणि डाव्यांची मैत्रीही हवी असल्याचे म्हटले आहे. गेल्या चार वर्षांपासून आमचे सरकार डाव्यांच्या पाठिंब्यावर टिकून आहे त्यांची मैत्री आम्हाला तोडायची नाही. पण, करारालाही मुकायचे नाही. तेव्हा डाव्यांनी आमची अपरिहार्यता समजून घ्यावी आणि विरोधी भूमिका मागे घ्यावी, असे कॉंगे्रसचे मत आहे.

'हिंदूनी रस्त्यावर उतरण्याची गरज'

मूर्ती नासधूसप्रकरणी निषेध सभेत सूर
कुडचडे, दि.२४ (प्रतिनिधी): गोव्यातील सर्व देवस्थानांनी एकत्रित येऊन हिंदू देवळांच्या अन्यायाविरुद्ध चळवळ सुरू करण्याचे प्रतिपादन फातोर्ड्याचे आमदार दामोदर नाईक यांनी केले.
शिरवई केपे येथील सोमेश्वर मंदिरातील मूर्त्यांची तोडफोड केल्याप्रकरणी आज (दि.२४) संध्याकाळी आयोजित केलेल्या कार्यक्रमात ते बोलत होते. हिंदू जनजागृती समितीने एकत्रित येऊन चळवळ सुरू करण्याची गरज असल्याचे प्रतिपादन आमदार नाईक यांनी यावेळी केले. यावेळी सांगेचे आमदार वासुदेव मेंग गावकर यांनी सांगितले की, हिंदू देवालयाच्या संरक्षणासाठी हिंदू समाजाने रस्त्यावर उतरण्याची गरज आहे. मूर्तीची नासधूस ही जाणून बुजून केली जात असून त्यावर सरकारने तोडगा काढणे गरजेचे आहे. केपेचे माजी आमदार प्रकाश वेळीप यांनी दुष्ट शक्ती फक्त हिंदूवरच अत्याचार करत असून अन्य धर्मीयांना मात्र काहीच केले जात नसल्याने हिंदूनी आता एकत्र येण्याची गरज आहे असे सांगितले.
गोविंद पर्वतकर यांनी सांगितले की, याप्रकरणी आता संपूर्ण गोवा बंद ठेवण्याची गरज आहे. झारंखडमधून येऊन काहीजण येथील स्थानिकांची मने बदलवू पाहत आहेत. आता कृती समिती काढून हा प्रश्न पुढे नेण्याची गरज आहे. यावेळी पर्वतकर यांनी मुख्यमंत्री कामत यांनी घटनास्थळी येऊन पाहणी करण्याची मागणी केली.
बजरंग दलाचे जयेश नाईक यांनी सांगितले की, सरकार हिंदू धर्मीयांची थट्टा करत आहे. लोकांनी कायदा हातात घेतल्यानंतरच सरकारला जाग येणार का असा सवाल करून त्यांनी प्रत्येकाने आपापली देवस्थानांचे संरक्षण करण्याची गरज असल्याचे सांगितले. राजीव वेलिंगकर यांनी गोव्यात इतर राज्यासारखी परिस्थिती उद्भवत असल्याचे सांगितले. शिवसेनेचे नामदेव नाईक यांनी जनतेने आता कायदा हातात घेतल्यास त्याला पोलिस व सरकारी यंत्रणा जबाबदार राहील असे म्हटले.
याप्रसंगी नेत्रावळीचे सरपंच शशिकांत गावकर, सुप्रज तारी, सुनिता देविदास, हेमंत देव, दिनेश नाईक, सुभाष वेळीप, सनातन प्रभातच्या रेखा देसाई, लक्ष्मण बोरकर यांनी आपले विचार मांडले.
यापूर्वी अशी १४ प्रकरणे घडली आहेत. पोलिस वा सरकार यापैकी कोणत्याच प्रकरणाचा शोध घेण्यात अपयशी ठरल्याने सरकारचा निषेध करण्यात आला.
यावेळी राष्ट्रीय स्वयंसेवक संघ, हिंदू जनजागृती समिती या संघटनेच्या सदस्यांनी आपले विचार मांडले.

कॅंटरखाली चिरडून विद्यार्थी जागीच ठार

मडगावात वातावरण तंग; वाहन पेटवले
मडगाव, दि.२४ (प्रतिनिधी): मडगावातील बेदरकार वाहतूक व्यवस्थेत आज आर्लेम फातोर्डा येथे आणखी एका शाळकरी मुलाचा बळी गेला. प्रथमेश प्रकाश नाईक (वय १०) असे या मुलाचे नाव असून तो होली स्पिरीट इन्स्टिट्यूटमध्ये पाचवीत शिकत होता. त्यामुळे खवळलेल्या जमावाने या अपघातास कारणीभूत ठरलेल्या मालवाहू कॅंटरला आग लावली. अग्निशामक दल व पोलिसांनी लागलीच हस्तक्षेप करून ती विझविली. तथापि, वातावरण तणावपूर्ण असल्याने तेथे रात्री उशिरापर्यंत सशस्त्र पोलिस तैनात करण्यात आले होते. पोलिसांनी कॅंटर चालकशेख इम्तियाज याला अटक केली आहे.
नेहमीप्रमाणे दुपारी १-१५ वाजता वर्ग सुटल्यावर प्रथमेश "जानकी' या (जीए ०२ टी ४७४३ ) बसने घरी निघाला. सदर मिनीबसमध्ये होली स्पिरीटचीच जास्त मुले असतात. मुलांना उतरवत ती बस आर्लेम नाक्यावरून टाटा शोरूम रस्त्यावर वळली व चंद्रावाडो रस्त्यावर थांबली. तेथे प्रथमेशसह एकूण ६ मुले उतरली. प्रथमेशचे घर उजवीकडे असल्याने तो थांबलेल्या बससमोरून गेला व मागून एखादे वाहन येते की काय ते पाहाण्यासाठी त्याने आपले डोके पुढे काढले तोच मागून भरधाव आलेल्या मालवाहू कॅंटरची (जीए ०१-डब्ल्यू ६२८१) ठोकर त्याच्या डोक्याला बसून तो उसळला आणि सुमारे ६ मीटरपर्यंत फरफटत गेला. मागच्या चाकाखाली सापडल्याने तो जागीच मरण पावला.
या अपघातानंतर लगेच तेथे लोक जमले ते पाहून कॅंटरचा चालक पळून गेला .जमावाने कॅंटरमधील सामानाच्या पेट्या बाहेर काढून त्या कॅंटरखाली ठेवून पेटवल्या. ती आग कॅंटरला लागेपर्यंत कोणीतरी पोलिस व अग्निशामक दलाला घटनेची माहिती दिली. त्यांनी येऊन आग विझविली, पण संतप्त जमावाला शांत करणे त्यांना शक्य झाले नाही .
दरम्यानच्या काळात तेथे गर्दी वाढू लागली व स्थिती स्फोटक बनत चालल्याचे पाहून पोलिस निरीक्षक धर्मेश आंगले यांनी वरिष्ठांना माहिती दिली. निरीक्षक राजेंद्र प्रभुदेसाई तेथे दाखल झाले. मात्र त्यामुळे फरक पडला नाही. त्यामुळे मामलेदार परेश फळदेसाई, उपजिल्हाधिकारी दीपक देसाई तेथे दाखल झाले. तसेच तमाम वाहतूक पोलिसांसह जादा पोलिस कुमक तेथे तैनात करण्यात आली.
या भीषण अपघातामुळे मडगावातील बेशिस्त व बेदरकार वाहतुकीचा प्रश्र्न पुन्हा ऐरणीवर आला आहे. गेल्या वर्षी याच दिवसात अशाच एका अपघातात सार्वजनिक बांधकाम खात्याच्या कार्यालयासमोर मिनीबस उलटून आठवीत शिकणारा लॉयोला हायस्कूलचा विद्यार्थी मरण पावला होता. त्याशिवाय लहान मोठे अपघात ही नित्याचीच बाब झालेली आहे. ज्यांनी वाहतुकीत शिस्त आणावी अशी अपेक्षा असते ते वाहतूक पोलिस महामार्गावर किवा रात्रीच्या वेळी नाक्यावर राहून परप्रांतीय मालवाहू वाहनांना सतावण्यात धन्यता मानतात. त्यामुळे शहरातील बेदरकार वाहतुकीवर नियंत्रण ठेवायचे कोणी, असा मूलभूत प्रश्न निर्माण झाला आहे. आजचा अपघात हा याच मालिकेतील एक भाग मानला जातो.
-------------------------------------------------------------------
बेभान वाहन चालकांना कोण रोखणार?
मुले जेव्हा शाळा सुटल्यावर रस्ता ओलांडून घराकडे जात असतात तेव्हा अन्य वाहनचालकांनी याची दखल घेणे गरजेचे असते. मात्र, त्याची फिकीर न करता काही अपवाद वगळता बहुतांश वाहन चालक भरधाव वाहने हाकतात. या वाहन चालकांवर पोलिसांनी कडक कारवाई करावी, अशी मागणी पालकांतून केली जात आहे. दरम्यान, दहा वर्षांच्या कोवळ्या प्रथमेशचा अपघातात मृत्यू झाल्याने त्याच्या कुटुंबीयांवर दुःखाचा डोंगर कोसळला आहे. अपघातस्थळी उपस्थित असलेले लोक त्यामुळे गलबलले.

करिशेट्टीची कसून चौकशी दोन दिवसांची पोलिस कोठडी

बेकायदा पार्किंग शुल्क प्रकरण
पणजी, दि. २४ (प्रतिनिधी): बेकायदा पाकिर्ंग शुल्क प्रकरणात अटक करण्यात आलेला पणजीचा सत्ताधारी गटातील नगरसेवक नागेश करिशेट्टी याला आज प्रथम वर्ग न्यायदंडाधिकाऱ्यांसमोर हजर करून दोन दिवसाची पोलिस कोठडी घेण्यात आली; तर या प्रकरणी मुक्तुम अन्निगरी (३५ रा. भाटले) याने अटकपूर्व जामिनासाठी न्यायालयात अर्ज दाखल केला असून त्यावर २६ जून रोजी सुनावणी होणार आहे. या सुनावणीवेळी मक्तुम याला प्रत्यक्ष हजर राहण्याचे आदेश न्यायालयाने दिले आहे.
पणजीत मांडवी पुलाखाली टोल आकारण्याचे काम मक्तुम पाहत होता. महापालिकेच्या नावाने पावत्या छापायचे कामही तोच पाहत असे, अशी माहिती करिशेट्टी याने पोलिसांना दिली. त्यानंतर पोलिस त्याला अटक करण्याच्या प्रयत्नात होते. १६ जून रोजी पोलिस स्थानकात तक्रार दाखल झाल्यापासून मक्तुम फरारी होता.
प्राप्त माहितीनुसार, करिशेट्टी याच्या आदेशानुसार आपण टोल घेत होतो, त्यानेच मला कामावर नेले होते. त्यासाठी तो मला दरमहा वेतन देत होता. टोल वसुलीचे हे काम बेकायदा असल्याची आपल्याला अजिबात माहिती नव्हती. त्यामुळे या प्रकरणात आपला कोणताही थेट सहभाग नाही, असे मक्तुम याने अटकपूर्व जामिनासाठी न्यायालयात केलेल्या अर्जात म्हटले आहे.
करिशेट्टी याने ज्या अन्य दोघा तरुणांना टोल गोळा जमा करण्यासाठी ठेवले होते त्यांच्या हाताखाली मक्तुम काम करत होता. त्या दोघा तरुणांना यापूर्वीच अटक करण्यात आली आहे.
सध्या पणजी पोलिस करिशेट्टीची कसून चौकशी करीत आहे. या विषयीचा तपास उपनिरीक्षक तुषार लोटलीकर करत आहेत.

कर्मचारी संघटनेची आज महत्त्वाची बैठक

पणजी, दि. २४ (प्रतिनिधी): गोवा सरकारी कर्मचारी संघटना व राज्यातील इतर सरकारी कर्मचारी संघटनेच्या ११ सदस्यीय समितीची बैठक उद्या २५ रोजी पाटो येथील कार्यालयात संध्याकाळी ५.४५ वाजता होणार आहे. संघटनेने घोषित केलेल्या लेखणी बंद आंदोलनाची पुढील कृती ठरवण्यासाठी तसेच सरकारला नवा प्रस्ताव सादर करण्यासंबंधी महत्त्वाची चर्चा यावेळी होणार आहे. ही माहिती संघटनेचे अध्यक्ष मंगलदास शेटकर यांनी दिली.
काल विविध सरकारी कर्मचारी संघटनांची संयुक्त बैठक घेण्यात आली. त्यात सरकार दरबारी चर्चा करण्यासाठी ११ सदस्यीय समितीची निवड करण्यात आली. या समितीकडून पुन्हा एक पाच सदस्यीय शिष्टमंडळ समिती नेमण्यात आली. त्यात मंगलदास शेटकर, सरचिटणीस गणेश चोडणकर, उपाध्यक्ष अरुण तळावलीकर, "आयटक'चे नेते ख्रिस्तोफर फोन्सेका व राजू मंगेशकर यांचा समावेश आहे. यावेळी झालेल्या चर्चेत बढती वेतनवाढ १ जानेवारी २००१ ते ३१ डिसेंबर २००५ पर्यंत मागण्याचे ठरवण्यात आले आहे. लेखणी बंद आंदोलन अद्याप मागे घेण्यात आले नसून हे आंदोलन केवळ स्थगित ठेवण्यात आले आहे. सर्व कर्मचाऱ्यांना त्यांच्या हुद्यानुसार समान वेतन मिळणे हा त्यांचा हक्क असून सरकारला केवळ आपल्या मर्जीतील लोकांना वाढीव वेतन देऊन त्यांचे लाड करता येणार नाहीत, असे शेटकर यांनी सांगितले.

हळर्ण येथे हत्तीने घेतला बळी वनरक्षकास पाय ठेवून चिरडले

मोरजी, दि. २३ (वार्ताहर) : राज्यातील काही भागात गेले वर्षभर हत्तींनी हैदोस घालून शेती व बागायतींची मोठ्या प्रमाणात हानी केल्यानंतरही निष्क्रिय बनलेल्या सरकारच्या बेफिकिरीने आज एका उमद्या कर्मचाऱ्यास आपले प्राण गमवावे लागले. वन खात्याचे कर्मचारी राजेंद्र कृष्णा भगत यांना काल मध्यरात्री हत्तीने पायाखाली चिरडून ठार केले. त्यामुळे आठवड्याभरात वनखात्याचे दोन बळी गेले आहेत.
रविवार २२ रोजी रात्री एक वाजता हळर्ण-तळर्ण भागात बागायतीत हत्ती आल्याची माहिती वनखात्याला मिळताच वनरक्षक राजेंद्र भगत अन्य कर्मचाऱ्यांसमवेत बागायतीत गेले असता त्यांना हत्ती नदीतून येत असल्याचे दिसून आले. भगत गावात परतले व लोकांना जमवून हत्तीचा बंदोबस्त करण्यासाठी पुन्हा बागायतीत गेले. त्यावेळी तीन हत्ती नुकतेच नदीतून वर येताना लोकांनी पाहिले. जो समोर हत्ती होता त्याने आपली सोंड वर करून चीत्कार केला. त्याचे डोळे लालबुंद होते. त्याचवेळी वनरक्षकाने त्या हत्तीवर टॉर्च मारली असता तो जोरदार आवाज करीत लोकांवर चाल करून आला, त्यावेळी लोक भयभीत होऊन वाट मिळेल त्या वाटेने पळत सुटले. त्यावेळी वनरक्षक राजेंद्र भगत खाली जमिनीवर पडल्याने त्यांच्यावरून हत्ती गेला व ते तेथेच चिरडून ठार झाले.
वनरक्षक राजेंद्र भगत हे ४२ वर्षीय कर्मचारी मानसीवाडा धारगळ पेडणे येथे राहत होते. त्यांच्या मागे पत्नी, एक मुलगा, मुलगी असा परिवार आहे. ते मनमिळाऊ स्वभावाचे होते. त्यामुळे गावात त्यांच्या मृत्यूबद्दल हळहळ व्यक्त केली जात आहे.
शोकाकुल वातावरणात अंत्यविधी
वनरक्षक श्री. भगत यांच्यावर मानसीवाडा धारगळ येथे २३ रोजी दुपारी शोकाकुल वातावरणात अंत्यसंस्कार करण्यात आले आहे. त्यावेळी पंचायतमंत्री बाबू आजगावकर, माजी आमदार परशुराम कोटकर, पेडणे उपजिल्हाधिकारी राजेंद्र मिरजकर, धारगळचे सरपंच भूषण ऊर्फ प्रदीप नाईक, कदंब महामंडळाचे संचालक दशरथ महाले, माजी सरपंच संतोष मळीक, मनोहर नाईक, रमेश मळीक, सुभाष डिचोलीकर, रामा नाईक, कालीस रॉड्रीग्स, सायमन डिकुन्हा, संतोष अमरे, दया गावस आदींनी भगत यांच्या कुटुंबीयांचे सांत्वन करून दुःख व्यक्त केले.
अशी घडली दुर्घटना
हळर्ण भागात २२ रोजी हत्ती आल्याची कुणकुण वनखात्याला लागली होती, त्यानुसार त्यांच्या बंदोबस्तासाठी वनरक्षक राजेंद्र भगत यांच्या नेतृत्वाखाली इतर सहा कर्मचारी त्या भागात गेले असता त्यांना हत्ती येत असल्याचे दिसले. ग्रामस्थांना घेऊन वनकर्मचारी बागायतीत गेले. तेथे हत्ती समोरून आपल्याच दिशेने येत असल्याचे पाहताच सर्वांनी धूम ठोकली. ग्रामस्थ व कर्मचारी गावात आल्यानंतर कोणकोण बागायतीत गेले होते, त्याची चौकशी आपसात करीत होते. आपल्यापैकी सर्वजण आले की नाही, याची चौकशी करता राजेंद्र भगत आले नसल्याचे त्यांच्या लक्षात आले. काही वेळानंतर पुन्हा ग्रामस्थ व वनकर्मचारी हातात टॉर्च व उजेडासाठी मशाली घेऊन बागायतीत गेले असता वनरक्षक भगत जमिनीवर पालथे निपचित पडलेले दिसले. हत्तीने त्यांना पायाखाली चिरडून ठार मारले होते.
श्री. भगत यांचा मृतदेह ज्या ठिकाणी पडला होता त्या भागाचा पोलिसांनी पंचनामा केला नाही. बांबोळी येथे मृतदेहाचा पोलिसांनी पंचनामा केला नाही. बांबोळी येथे मृतदेहाचा पंचनामा केला. भगत यांचे तोंड जमिनीवर टेकून होते. तोंडातून रक्त आले होते. या घटनेची माहिती पेडणे पोलिसांना रात्री २ नंतर देण्यात आली. त्याअगोदर ग्रामस्थांनी व कर्मचाऱ्यांनी बागायतीतील मृतदेह गावात आणला होता.

वनखात्याचा दुसरा बळी
दि. १७ रोजी धारगळ येथे जो भीषण अपघात घडला होता त्या अपघातात पेडणेचे वनअधिकारी काशिनाथ शेट्ये हे जागीच ठार झाले होते. त्यानंतर सहा दिवसांच्या फरकाने २२ रोजी रात्री हळर्ण येथे हत्तीने पायाखाली चिरडून वनरक्षक राजेंद्र भगत यांना ठार केल्याने पेडणे वनखात्याचा दुसरा बळी गेला आहे. त्यामुळे खात्याला जबरदस्त धक्का लागला.

आजचे मरण उद्यावर
दि. १७ रोजी धारगळ येथे जो भीषण अपघात होऊन वनअधिकारी काशीनाथ शेट्ये मृत्युमुखी पडले, त्याच वाहनातून वनरक्षक राजेंद्र भगत जाणार होते, परंतु त्यांना काही महत्त्वाचे काम पडल्याने ते गाडीतून धारगळ येथे उतरले. म्हणूनच ते त्याचवेळी बचावले. परंतु काळाने त्यांच्यावर २२ रोजी झडप घातली.

हजारोंचे नुकसान
दि. २२ रोजी हत्तींनी जो हळर्ण बागायतीत धुमाकूळ घातला त्यात केळी, सुपाऱ्यांच्या पोफळी, कवाथे यांचे जवळजवळ १ लाख रुपयांपेक्षा जास्त नुकसान झाले आहे. यात लक्ष्मण सावंत, पांडुरंग गरड, गणेश गरड, मुकुंद नारायण परब, रत्नाकांत परब, बापू परब, आना परब व भूषण परब आदींचे नुकसान केले आहे.
दरम्यान, बागायतीत हत्ती आल्याने त्यांचा बंदोबस्त करण्यासाठी वनखात्याच्या कर्मचाऱ्यांसोबत स्थानिक ग्रामस्थ रत्नाकांत परब, हौसराज परब, ज्ञानेश्वर परब, मयूर परब, मकरंद परब, प्रशांत परब, खाजू परब, अभय परब, गोपी परब, आना परब, कृष्णा परब, महेश परब, मिलिंद परब, भूषण नाईक, सुभाष परब गेले होते.
तीन हत्तींचा कळप
हळर्ण भागात २३ रोजी सकाळी साडे नऊ वाजता तीन हत्तींचा कळप ग्रामस्थांनी पाहिल्याची माहिती दिली. गेले वर्षभर हत्ती बागायतींची नासाडी करत आहे. आता मात्र माणसांचेही बळी घेण्याचे काम हत्ती करू लागल्याने न्याय कुणाकडे मागावा, अशी केविलवाणी परिस्थिती शेतकऱ्यांची आहे. आता कितीही हत्ती आले तरी त्यांना पिटाळून लावण्यासाठी आम्ही जाणार नाही, असे शेतकऱ्यांनी सांगितले.
मुख्यमंत्री पर्रीकर असते तर...
राज्याचे मुख्यमंत्री मनोहर पर्रीकर असते तर त्यांनी त्वरित धाव घेतली असती व शेतकऱ्यांना दिलासा दिला असता, सामान्य शेतकऱ्यांचे दुःख पर्रीकरांना माहीत होते. तेच आम्हाला न्याय देऊ शकले असते, असे मत नुकसानग्रस्त शेतकऱ्यांनी व्यक्त केले.
दरम्यान, या भागाचे आमदार तथा पंचायत मंत्री बाबू आजगावकर यांनी आजपर्यंत ज्या शेतकऱ्यांची नुकसानी झाली आहे त्याची साधी विचारपूस केली नसल्याचा दावा शेतकऱ्यांनी केला.
-------------------------------------------------------------
वनखात्याकडे सामग्री नाही
हत्तींचा बंदोबस्त करण्यासाठी वनखात्याने कर्मचारी व वनरक्षकाला केवळ हातबॉम्ब फटाके व टॉर्च एवढेच साहित्य देऊन मोहिमेवर पाठवले जाते. पिसाळलेल्या हत्तींनी जर असेच वनरक्षकांचे बळी घेतले तर सरकार काय करेल, असा प्रश्न स्थानिक ग्रामस्थ उपस्थित करीत आहेत.
-------------------------------------------------------------

सोमेश्वर देवस्थानात मूर्तींची नासधूस

केपे, दि.२३ (वार्ताहर) : शिरवई केपे येथील सोमेश्वर देवस्थानातील नवग्रह मूर्ती, तसेच तुळशी वृंदावन आणि देवळातील नंदीची मोडतोड केल्याने येथील लोकांत संतापाची लाट उसळली आहे. सदर देऊळ रस्त्याशेजारी आहे. मंदिरात दोन्ही बाजूंनी आत प्रवेश करता येतो. याचा फायदा घेत अज्ञाताने ही कृती केली असावी असे बोलले जाते. काही दिवसांपूर्वी या मंदिरातील फंडपेटी चोरून नेण्यात आली होती. त्यावेळी पोलिसांनी मंदिराच्या समितीला सुरक्षा रक्षक नेमण्याची सूचना केली होती. यावेळी पोलिसांनी अज्ञाताचा शोध घेण्यासाठी श्वान पथक तसेच ठसे तज्ज्ञांची मदत घेतली. पण ठसे घेता न आल्याने ते माघारी परतले. तसेच श्वान मागवा घेत जात असताना पुढे जात असताना घसरून पडल्याने जखमी झाले. त्याचा परिणाम यावर झाला. केपेचे उप अधीक्षक रोहिदास पत्रे यांनी घटनास्थळी जाऊन पाहणी केली. पोलिसांनी अज्ञात व्यक्तीविरुद्ध गुन्हा नोंदवला आहे.