भाजपमध्ये होतो आणि भाजपमध्येच राहणार - मुंडे

नवी दिल्ली, दि. २२
‘मी भाजपमध्ये होतो व भाजपमध्येच राहणार आहे’, असे सांगत गोपिनाथ मुंडे यांनी गेल्या काही दिवसांपासून सुरू असलेल्या सर्व तर्कवितर्कांना पूर्णविराम दिला. आज भाजप नेत्या आणि लोकसभेतील विरोधी पक्षनेत्या सुषमा स्वराज यांच्याशी झालेल्या चर्चेनंतर लोकसभेतील विरोधी पक्षाचे उपनेते मुंडे यांनी पत्रकार परिषद घेतली.
स्वराज यांच्या उपस्थितीत घेतलेल्या या पत्रकार परिषदेमध्ये मुंडे यांनी आपण भाजपमध्येच राहणार असल्याचे सांगितले. ‘मी भाजप सोडणार अशा स्वरूपाच्या बातम्या जाणीवपूर्वक विशिष्ट व्यक्तींकडून पसरवल्या जात आहेत. मात्र या बातम्यांत काहीही अर्थ नाही’, असे मुंडे म्हणाले.
अडवाणी, व्यंकय्या नायडू आदींशी झालेल्या चर्चेत मुंडेंनी आपले म्हणणे मांडले. त्यानंतर त्यांनी सुषमा स्वराज यांची भेट घेतली. या भेटीत झालेल्या चर्चेअंती मुंडेंनी भाजपमध्येच राहणार असल्याचे सांगितले आणि बंडखोरी करून पक्ष सोडणार असल्याच्या सर्व राजकीय तर्कवितर्कांना पूर्णविराम दिला.