अरुणाचलचे मुख्यमंत्री सुखरूप

बेपत्ता झालेले हेलिकॉप्टर भूतानमध्ये उतरले
इटानगर, दि. ३० : अरुणाचल प्रदेशचे मुख्यमंत्री दोरजी खांडू यांना घेऊन तवांग येथून इटानगरकडे निघालेले हेलिकॉप्टर बेपत्ता झाल्याची भीती सुदैवाने खोटी ठरली आहे. मुख्यमंत्री पूर्णपणे सुखरूप असून हेलिकॉप्टरमध्ये तांत्रिक बिघाड झाल्याने ते भूतानमध्ये उतरविण्यात आल्याचे स्पष्ट झाल्यानंतर सगळ्यांचा जीव भांड्यात पडला.
तवांग येथून आज सकाळी १० वाजण्याच्या सुमारास खांडू यांच्या हेलिकॉप्टरने उड्डाण केल्यानंतर काही वेळातच त्यामध्ये तांत्रिक बिघाड झाला व या हेलिकॉप्टरचा हवाई वाहतूक नियंत्रण कक्षासोबतचा संपर्क तुटला. मात्र, त्यानंतर हेलिकॉप्टर तवांगच्या जवळच परंतु, भूतानच्या भूमीवर उतरवण्यात आले, असे मुख्यमंत्र्यांच्या कार्यालयाने या घटनेबाबत माहिती देताना सांगितले. पवनहंस हेलिकॉप्टरच्या बी-३ जातीच्या या हेलिकॉप्टरमध्ये खांडू यांच्याव्यतिरिक्त दोन प्रवासी आणि चालक दलाचे दोन सदस्य होते. खांडू यांचे हेलिकॉप्टर दोपोरिजो येथे उतरवण्यात आले, अशी माहिती कोलकातास्थित संरक्षण खात्याच्या सूत्राने दिली. खांडू यांच्यासोबत लामू या त्यांच्या नातेवाईक, त्यांचे सुरक्षा अधिकारी छोडक, कॅप्टन बब्बर व कॅप्टन माणिक हे चालक दलाचे सदस्य होते.