आगोंद धवळखाजन येथे एक बुडाला, तिघांना वाचवले

काणकोण, दि. १ (प्रतिनिधी)
आगोंद येथील समुद्रकिनार्‍यावर सहलीसाठी आलेल्या पर्वरी येथील अमित अर्जुन रेडकर (२४) या युवकाचा बुडून मृत्यू झाला. पर्वरी येथील सहा व डिचोली येथील दोघेजण सहलीसाठी आगोंद धवळखाजन येथे फिरण्यास आले होते. .यावेळी ही घटना घडली. यावेळी इतर तिघांना वाचवण्यात यश आले. आज सकाळी ११ च्या सुमारास पर्वरीतील अमित रेडकर, सिद्धेश रेडकर (१३), श्रुती नाटेकर (१७), मैथिली नाटेकर (२४), प्रियांका केरकर (२४), साईश नाटेकर (१३) व डिचोलीतील ऐश्‍वर्या राणे (२५) व ऋचा राणे (२४) अशा आठ जणांचा एक गट धवळखाजन येथे एका पर्यटन कुटिरात उतरला. संध्याकाळी ४ वा. ऋचा व ऐश्‍वर्या या घरी परतल्या, तर नाटेकर व रेडकर मागे थांबले. त्यापैकी सिद्धेश, प्रियांका, मैथिली व अमित आंघोळीसाठी पाण्यात उतरले. यावेळी चौघेही पाण्यात बुडू लागल्याने त्यांनी वाचवण्यासाठी आरडाओरड केली. यावेळी प्रदीप पागी व आल्केश पागी या स्थानिकांनी व जीवरक्षकांनी त्यांना वाचवण्याचे प्रयत्न केले. मात्र अमित हा १० ते १५ मिनिटे पाण्यात बुडाल्याने त्याचा मृत्यू झाला. यावेळी इतर तिघांना वाचवण्यात यश मिळाले. अग्निशामक दलाचे जवान व १०८ रुग्णवाहिकेने अमित याला काणकोण इस्पितळात आणले मात्र डॉक्टरनी त्याला मृत घोषित केले.