वाडे-वास्कोत डेंग्यूची साथ?

वास्को, दि. १५ (प्रतिनिधी): वाडे-वास्को येथे असलेल्या 'कर्मा रेसिडेन्शीयल एनक्लेव' ह्या खासगी वसाहतीत राहणाऱ्या दोन बालकांना डेंग्यू झाल्याचे आज उघड झाल्याने सदर परिसरात भीतीचे वातावरण पसरले आहे. वास्कोतील नागरी आरोग्यकेंद्राचे चिकित्सक विकास कुवेलकर यांनी सदर ठिकाणी जाऊन पाहणी केली असता ज्या फ्लॅटमधील एका बालकाला डेंग्यू झाला आहे तेथीलच झाडाच्या कुंडीत या साथीचे डास वाढत असल्याचे त्यांना आढळून आले.
एका आठवड्यापूर्वी सुमारे दहा ते बारा वर्षाच्या एका मुलाला प्रथम डेंग्यू झाल्याचे समजले होते. त्यानंतर तीन ते चार दिवसांपूर्वी याच वसाहतीतील दुसऱ्या एका मुलाला डेंग्यू झाला असल्याची माहिती मिळाली. दोघांनाही उपचारांसाठी इस्पितळात दाखल करण्यात आले.
दरम्यान, सूत्रांनी दिलेल्या माहितीनुसार, या वसाहतीतील आणखी एका मुलीला डेंग्यू झाला असून वसाहतीतील अन्य काही जणांना ताप येत आहे. त्यांनाही डेंग्यू झाला असल्याचा संशय व्यक्त केला जात असून ही साथ पसरत असल्याचे लोकांचे म्हणणे आहे.