वेळसाव किनाऱ्यावर तेलतवंगाचा विस्तार

मडगाव, दि. १ (प्रतिनिधी): कोलवा-बेताळभाटी किनाऱ्यावरील तेल तवंगाचे गोळे आज वेळसाव किनाऱ्यापर्यंत पोचल्याने त्या भागात चिंतेचे वातावरण पसरले आहे. दुसरीकडे पर्यटन खात्याने आज तेल तवंग गोळा करून किनारा साफ करण्याचे काम युद्धपातळीवर हाती घेतल्याचे दिसून आले.
स्थानिक सूत्रांनी दिलेल्या माहितीनुसार काल सायंकाळपासून या किनाऱ्यावर तवंग पसरून ओहोटीच्या वेळी किनारा काळा झाल्याचे दिसून आले. यानंतर स्थानिक पंचायतीने हा प्रकार संबंधित अधिकाऱ्यांच्या लक्षात आणून दिला. यानंतर साफसफाईचे काम सुरू झाले. आज सुमारे ३५ कामगार या मोहिमेवर होते व त्यांनी अर्धाअधिक किनारा साफ केला.
दुसरीकडे कोलवा व बेताळभाटी किनाऱ्यावरील साफसफाई अंतिम टप्प्यात आली आहे. दरम्यान, तेलतवंग पसरण्यामागचे नेमके कारण अद्याप गुलदस्त्यातच आहे.