बागा समुद्रात बुडून मेरशीच्या तरुणचा मृत्यू

म्हापसा, दि. २८ (प्रतिनिधी): वाडी मेरशी येथील सुकूर डिसा (वय २५) हा आंघोळीसाठी आज बागा समुद्रात उतरला असता बुडून मरण पावला.
कळंगुट पोलिसांनी दिलेल्या माहितीनुसार, सुकूर हा आपल्या भावंडांसह बागा समुद्रावर आला होता. स्नानासाठी तो समुद्रात उतरला. मात्र जोरदार लाटांच्या प्रवाहांमुळे तो गटांगळ्या खाऊ लागला. तेथील जीव रक्षकांनी त्याला वाचवण्याचा आटोकाट प्रयत्न केला, तथापि तो निष्फळ ठरला. सायंकाळी पावणेसहाच्या सुमारास जीव रक्षकांनी त्याचा मृतदेह पाण्याबाहेर काढला. घटनेचा पंचनामा कळंगुट पोलिसांनी केला आहे. मृतदेह चिकित्सेसाठी बांबोळी येथे "गोमेकॉ'त पाठवण्यात आला आहे.