आदिवासी सबप्लॅनखाली क्रीडा खात्यात लूटसत्रच!

'उटा'चा आरोप व उच्चस्तरीय चौकशीची मागणी
मडगाव, दि. १५ (प्रतिनिधी): आदिवासी सबप्लॅनखाली गोव्यात व विशेषतः क्रीडा खात्यात उघडपणे लूट सुरू असल्याचा गंभीर आरोप "उटा'ने (युनायटेड ट्रायबल असोसिएशन) केला आहे. या प्रकाराची उच्चस्तरीय चौकशी करावी आणि याप्रकरणी क्रीडा संचालकांना निलंबित करावे अशी मागणी केली आहे. या योजनेखाली खात्याला यंदा ३ कोटी रुपयांचा निधी मिळाला होता.
"उटा'तर्फे आज येथे घेतलेल्या पत्रकार परिषदेत बोलताना पैंगीणचे आमदार रमेश तवडकर यांनी सांगितले की, आपण माहिती हक्क कायद्याखाली मागितलेल्या कागदपत्रांवरूनच ही लूट सिद्ध होत असून आपण सदर दस्तऐवज दक्षता खात्याला सादर करून चौकशीची मागणी केली आहे.
ते म्हणाले की, खात्याने या योजनेखाली केलेली आर्थिकतरतूद वर्षभर खर्च न करता तशीच ठेवली आणि अंतिमतः आदिवासी लोकसंख्या नसलेल्या पेडणे तालुक्यात क्रीडामहोत्सव आयोजून स्वतःचे हसे करून घेतले. जेथे आदिवासी लोकसंख्या नाही तेथे असा महोत्सव व स्पर्धा आयोजित करण्याचे प्रयोजन काय? त्याऐवजी दक्षिण गोव्यातील कोणत्याही तालुक्यात तो का आयोजिला नाही?
क्रीडा खात्याच्या या बिनडोक कारभारावरून त्यांच्याकडे कसलेच नियोजन नसल्याचे स्पष्ट झाले आहे, असा ठपका त्यांनी ठेवला. "उटा'चे अध्यक्ष प्रकाश वेळीप यांनीही त्यांच्या आरोपाला दुजोरा देताना राजकीय दडपणामुळे असे प्रकार वाढत चालल्याचे सांगितले.
आमदार तवडकर म्हणाले, गेल्या वर्षी "उटा'ने आपल्या मागण्यांसाठी प्रचंड मोर्चा काढल्यावर सरकारने सर्व मागण्या विनाविलंब पूर्ण करण्यासाठी पावले उचलली जातील असे आश्र्वासन दिले होते; प्रत्यक्षात अजून एकाही मागणीची पूर्तता झाली नसल्याचे त्यांनी स्पष्ट केले.