पाच वर्षात एजी कंटक यांचे शुल्क ४ कोटी २० लाख!

पणजी, दि. २४ ः गोव्याचे ऍडव्होकेट जनरल सुबोध कंटक यांना राज्य सरकारने जून २००५ ते जुलै २००९ या पाच वर्षांच्या कालावधीत चार कोटी २० लाख १८ हजार सातशे पन्नास रुपये शुल्कापोटी फेडले असल्याची माहिती उपलब्ध झाली आहे. ऍड. आयरिश रॉड्रिगीस यांनी माहिती हक्क कायद्याखाली कायदा खात्याकडून ही अधिकृत माहिती मिळविली आहे.
ऑगस्ट, सप्टेंबर व ऑक्टोबर २००९ या महिन्यांच्या शुल्काचा या रकमेत समावेश नाही. महाराष्ट्र, कर्नाटक व गुजरात सारख्या मोठ्या राज्यांच्या ऍडव्होकेट जनरलना सरासरी दरमहा ५० हजार रुपयांपेक्षा अधिक शुल्क दिले जात नाही, मात्र गोव्यासारख्या राज्यात हे महागडे सल्लागार सरकारने का नेमले आहेत,असा प्रश्न ऍड. रॉड्रीगीस यांनी विचारला आहे.
कॉंग्रेस विधिमंडळ गट, भाजप, शिवसेना, युजीडीपी, सेव्ह गोवा फ्रंट तसेच राष्ट्रवादी कॉंग्रेस यांनी वेळोवेळी एजींना देण्यात येणाऱ्या अवाढव्य शुल्काबाबत नाराजी व्यक्त केलेली आहे, शिवाय त्याबद्दल विधानसभा अधिवेशनातही चिंता व्यक्त करण्यात आली होती,याकडे ऍड. रॉड्रीगीस यांनी लक्ष वेधले आहे.