त्या '५२' शिक्षकांना नियुक्तीपत्रे

शिक्षणमंत्री मोन्सेरात यांची वाढदिनी भेट
पणजी, दि. १९ (प्रतिनिधी): गोवा लोकसेवा आयोगाने सरकारी उच्च माध्यमिक व भागशिक्षणाधिकारीपदांसाठी निवडलेल्या "त्या' ५२ शिक्षकांना अखेर न्याय मिळाला आहे. सरकारी नेमणूकपत्रे मिळून हे शिक्षक विविध ठिकाणी आपल्या सेवेत रुजू झाले आहेत. शिक्षणमंत्री बाबूश मोन्सेरात यांचा उद्या २० रोजी वाढदिवस असल्याने या शिक्षकांसाठी बाबूश यांनी दिलेली ही वाढदिवसाची भेटच ठरली आहे.
राज्यातील विविध सरकारी उच्च माध्यमिक व भागशिक्षणाधिकारीपदांसाठी गोवा लोकसेवा आयोगाने एकूण ५२ शिक्षकांची निवड केली होती. ही निवड यादी सरकारला पाठवल्यानंतर ती मान्य करण्यावरून सरकारात मतभेद निर्माण झाल्याने ती रखडली. या निवडप्रक्रियेला याच महिन्यात एक वर्ष पूर्ण झाले. शैक्षणिक पात्रतेच्या आधारावर निवडलेल्या या शिक्षकांनी सरकारकडे अनेकवेळा विनंत्या, अर्ज करून थकल्यानंतर निर्वाणीचा इशारा देत आमरण उपोषणाचा निर्णय घेतला. या शिक्षकांना सर्व थरांतून पाठिंबा मिळत गेल्याने व सरकारची याप्रकरणी बदनामी झाल्याने अखेर सरकारही ही यादी मान्य करणे भाग पडले.
या शिक्षकांना न्याय मिळवून देण्यात शिक्षणमंत्री बाबूश मोन्सेरात यांनी महत्त्वाची भूमिका बजावली. बाबूश यांनी सुरुवातीपासूनच या यादीला पाठिंबा दिला होता. गोवा लोकसेवा आयोगाने निवडलेल्या यादीत सर्व शिक्षक पात्रच असतील,असे ठामपणे सांगून त्यांनी या शिक्षकांना न्याय देण्याचे आश्वासनही दिले होते.मध्यंतरी सरकारातीलच काही नेत्यांकडून मुख्यमंत्री कामत यांच्यावर दबाव वाढल्याने ही यादी रद्द करून फेरनिवड करण्यापर्यंत सरकारची मजल गेली होती.
शेवटी अखेर मुख्यमंत्र्यांनीही या यादीला हिरवा कंदील दाखवला. गोवा मुक्तीदिन व त्यात शिक्षणमंत्री बाबूश मोन्सेरात यांचा वाढदिवस या पार्श्वभूमीवर या शिक्षकांना नेमणूकपत्रे देऊन त्यांना विविध ठिकाणी रिक्त पदांवर नेमण्यातही आले आहे. या शिक्षकांचा नेमणुकीला मुंबई उच्च न्यायालयाच्या गोवा खंडपीठात आव्हान देणाऱ्या दोन याचिका सादर झाल्या आहेत. न्यायालयाने या याचिका दाखल करून घेतल्या असल्या तरी या निवडीला स्थगिती देण्यास मात्र नकार दिला आहे. लोकसेवा आयोगाला आता न्यायालयात ही निवड कायदेशीर व आयोगाच्या मार्गदर्शक तत्त्वानुसार झाल्याचे सिद्ध करावे लागणार आहे.