करमणे येथील सुपर सेंटर खाक

४० लाखांची हानी

मडगाव, दि.३० (प्रतिनिधी) : करमणे येथे रस्त्यालगत असलेल्या मेंडिस सुपर सेंटर ऍण्ड वाइन शॉपला आज सकाळी अचानक आग लागल्याने दारूच्या बाटल्यांसहित विक्रीच्या वस्तू तसेच लाकडी सामान खाक झाले. प्राथमिक अंदाजानुसार या आगीमुळे ४० लाखांपेक्षा अधिक नुकसान झाले आहे.
आज सकाळी ६.३० वाजण्याच्या सुमारास अचानक आगीच्या ज्वाळा व आवाज येऊ लागल्याने शेजारचे लोक तत्काळ घटनास्थळी धावले. या घटनेची माहिती अग्निशामक दलाला देण्यात आली. मडगाव व वेर्णा येथील अग्निशमन बंबांनी तेथे धाव घेऊन आग विझवण्याचे काम सुरू केले. दुपारी ११.३० वाजेपर्यंत आग विझवण्याचे काम सुरू होते. दरम्यान, आगीचे कारण कळू शकलेले नसले तरी मोठ्या प्रमाणात नुकसानी झाल्याचे सांगण्यात आले. कायतान गोम्स मेंडिस यांच्या मालकीचे हे सेंटर असून त्यांनी आपली सर्व मिळकत सदर इमारत व शॉपिंग सेंटरमध्ये गुंतवली होती. या आगीमुळे त्यांचे फार मोठे नुकसान झाले आहे.