रेईश मागूश पंच सदस्य हल्ला प्रकरणी दोघांना अटक

पणजी, दि. १७ (प्रतिनिधी)- रेईश मागूशचे पंच सदस्य फ्रान्सिस सेरांव यांच्यावर तलवार व रॉडने प्राणघातक हल्ला करून फरार झालेल्या दोघा संशयितांना काल रात्री गुन्हा अन्वेषण विभागाच्या पोलिसांनी अटक केली. दि. ५ फेब्रुवारी ०९ रोजी सकाळी श्री. सेरांव हे शाळेत जात असताना वाटेत अडवून हल्लेखोरांनी त्यांना गंभीर जखमी केले होते. त्या घटनेपासून म्हणजेच गेल्या दोन महिन्यांपासून हल्लेखोर फरार होते. काल रात्री पोलिसांनी सापळा रचून दीपक शर्मा (रा. बेती वेरे) व साल्वादोर फर्नांडिस ऊर्फ गालू (रा. ताळगाव) यांना अटक केली. आज दुपारी प्रथम वर्ग न्यायदंडाधिकाऱ्यांसमोर उभे करून सात दिवसाची पोलिस कोठडी मिळवण्यात आल्याची माहिती गुन्हा अन्वेषण विभागाच्या पोलिसांनी दिली.
या हल्ल्यामागील मुख्य सूत्रधार कळंगुटचे आमदार व फ्रान्सिस कुलासो असल्याचा आरोप रेईश मागूशचे सरपंच तसेच अन्य पंच सदस्यांनी केला होता. त्याचप्रमाणे आरोपींना पकडण्यासाठी कळंगुट पोलिस स्थानकावर मोर्चाही काढण्यात आला होता. परंतु, कळंगुट पोलिसांना आरोपींना अटक करण्यात अपयश आल्याने सदर प्रकरण गुन्हा अन्वेषण विभागाकडे सोपवण्यात आले होते. गेल्या काही दिवसांपासून या विभागाचे पोलिस त्यांच्या मागावर होते. काल रात्री दीपक व गालू
घरी आल्याची माहिती मिळाल्यानंतर त्यांना सापळा रचून अटक करण्यात आली.
"सुपारी' घेऊन हे कृत्य केल्याचा प्राथमिक अंदाज पोलिसांनी व्यक्त केला असून पकडण्यात आलेल्या संशयितांची कसून चौकशी सुरू असल्याचे या विभागाच्या एका वरिष्ठ अधिकाऱ्याने सांगितले.
पंच सदस्य सेरांव नेहमीप्रमाणे सकाळी आपल्या "डिओ' दुचाकीवरून शाळेत निघाले असता तोंडावर बुरखा परिधान करून आलेल्या हल्लेखोरांनी त्यांच्यावर प्राणघातक हल्ला चढवला होता. हा हल्ला पूर्वनियोजित असून रेईश मागूश पंचायत ताब्यात घेण्यासाठी पंच सदस्यांना अशा प्रकारे धमकावले जात असल्याचा दावा उपसरपंच वीरेंद्र शिरोडकर यांनी केला होता. त्याचप्रमाणे हल्लेखोरांची संख्या एकूण चार असल्याची माहिती त्यांनी त्यावेळी पोलिसांनी दिली होती. त्यानुसार पोलिस अन्य संशयितांचा शोध घेत आहेत.