बलात्कारप्रकरणी रोहितवर आरोप निश्चितीचे आदेश

पणजी, दि. २९ (प्रतिनिधी) : अल्पवयीन जर्मन मुलीवर बलात्कार प्रकरणात गुंतलेल्या रोहित मोन्सेरात याच्याविरोधात आज बाल न्यायालयाने आरोप निश्चित करण्याचे आदेश दिले.
अल्पवयीन मुलीवर बलात्कार आणि अश्लील "एसएमएस' पाठवल्याचे त्याच्यावर ठेवण्यात आलेले आरोप आज निश्चित करण्यात आले.
शारीरिक संबंध आल्याचा वैद्यकीय अहवाल आणि साक्षीदारांची जबानी रोहितवर आरोप निश्चित करण्यासाठी पुरेसे असल्याचा जोरदार युक्तिवाद यावेळी सरकारी वकिलांनी केला. तर, रोहित याच्या विरोधात कोणतेही पुरावे नसल्याचा दावा करून हे आरोप फेटाळून लावण्याचा प्रतिवाद रोहित याच्या वकिलाने न्यायालयात केला.
गेल्या दोन महिन्यापूर्वी रोहितच्या विरोधात कळंगुट पोलिसांनी आरोपपत्र दाखल केले होते. त्यापूर्वी रोहित याला या प्रकरणात काही रात्री तुरुंगात घालवाव्या लागल्या होत्या. सुरुवातीला मुंबई उच्च न्यायालयाने हे प्रकरण गांभीर्याने घेऊन कळंगुट पोलिसांना आरोपपत्र दाखल करण्याचे आदेश देण्यात आले होते. त्यानंतर आरोपपत्र दाखल झाले होते.