बैलपार सांगे नदीमध्ये नेसायचा इसम बुडाला

सांगे, दि.७ (प्रतिनिधी) - खुरीस नेसाय येथील सायमन कार्दोझ (४२) या इसमाचा बैलपार सांगे येथील नदीत आज दुपारी २.३० च्या सुमारास बुडाला. संध्याकाळी उशिरापर्यंत त्याचा देह हाती लागला नव्हता.
कार्दोझ व त्याचे पाच मित्र सकाळी ११ वाजता बैलपार नदीवर आंघोळ व मौज करण्यासाठी आले होते. दुपारी २.३० पर्यंत आंघोळ करून सर्वजण घरी जाण्यासाठी काठावर आले. इतक्यात त्यांचे आणखीन दोन मित्र त्या ठिकाणी पोहोचले व त्यांनी परत आंघोळ करूया, असे सांगितले. त्यानंतर केवळ सायमन पुन्हा पाण्यात पोहण्यासाठी उतरला. पोहण्यात तरबेज असलेल्या इतर दोघांसह सायमन खोल पाण्यात दूरवर गेला आणि खोल पाण्यात बुडाला. मित्रांनी त्याला शोधण्याचा प्रयत्न केला, पण त्यांना यश आले नाही. सांगे पोलिस व कुडचडे अग्निशामक दलाला याविषयी कळवण्यात आल्यानंतर त्याचा शोध घेण्याचा प्रयत्न करण्यात आला. मात्र, सायंकाळी उशिरापर्यंत त्याचा देह हाती लागला नाही. सायमन याला तीन लहान मुली असून येत्या सोमवारी तो कामानिमित्त कुवेतला जाणार होता, अशी माहिती मिळाली आहे.