मेहुण्याच्या खूनप्रकरणी अहमद अलीला जन्मठेप

पणजी, दि. २७ (प्रतिनिधी): मेहुण्याचा खून केल्याप्रकरणी उत्तर गोव्याचे मुख्य सत्र न्यायाधीश उत्कर्ष बाक्रे यांनी आपेव्हाळ, प्रियोळ येथील अहमद अली (५५) याला आज जन्मठेपेची शिक्षा सुनावण्यात आली. २३ नोव्हेंबर २००५ रोजी रात्री ११ वाजण्याच्या सुमारास ही खुनाची घटना घडली होती.
सरकारी वकील सुभाष देसाई यानी एकूण २२ साक्षीदारांच्या जबान्या घेतल्या. आरोपी आपल्या बायको मुलांसह मयत नियाझुद्दीन शेख यांच्या वडिलोपार्जित घरात राहत होता. पती पत्नीमध्ये वाद सुरू असता नियाझुद्दीनने आरोपीला ताकीद दिली असता आरोपीने रागाच्या भरात त्याच्या छातीत सुरा खुपसला होता. नियाझुद्दीन रक्ताच्या थारोळ्यात बेशुद्ध पडला, फोंडा आरोग्य अधिकारी डॉ. विकास कुवेलकर यांनी तो मरण पावल्याचा दाखला दिला होता.
आरोपीच्या पत्नीने तसेच मुलीने सुनावणीवेळी साक्ष बदलली होती तर मयताच्या पत्नीने घटना पाहिली होती व तिने साक्ष दिली. फोंड्याचे निरीक्षक व या प्रकरणाचे तपास अधिकारी वाय. एन. देसाई यांनी २४ नोव्हेंबर रोजी अटक केली होती. तेव्हापासून आरोपी कोठडीत होता.
आरोपीने केलेला गुन्हा गंभीर स्वरूपाचा असल्याने कलम ३०२ खाली जन्मठेपेची शिक्षा ठोठावण्यात यावी, अशी शिफारस सरकारी वकील सुभाष देसाई यांनी केली. आरोपीला जन्मठेप व दहा हजार रुपये दंडाची शिक्षा ठोठावण्यात आली. दंड न भरल्यास वाढीव एक वर्ष कैद अशी शिक्षा ठोठावण्यात आली आहे.