पेट्रोल, डिझेल आणखी स्वस्त होणार

नवी दिल्ली, दि. १६ : जागतिक बाजारात कच्च्या तेलाच्या किंमतीतील घसरण सुरूच असल्याने आगामी काही दिवसात देशात पेट्रोल, डिझेलचे दर आणखी कमी होण्याचे संकेत आज केंद्र सरकारने दिले.
केंद्रीय गृहमंत्री पी. चिदम्बरम यांनी आज प्रश्नोत्तराच्या तासादरम्यान पुरवणी प्रश्नाच्या उत्तरात ही माहिती दिली. चिदम्बरम हे सध्या पंतप्रधानांना अर्थमंत्रालय सांभाळण्यातही मदत करीत आहेत. ते म्हणाले की, इंधनाच्या किंमती कमी करण्याची मागणी सातत्याने केली जात आहे. समाजातील सर्व स्तरातून ही मागणी होत आहे. काही दिवसांपूर्वीच सरकारने पेट्रोल ५, तर डिझेल २ रुपयांनी स्वस्त केले. कच्च्या तेलाच्या किंमती कमी झाल्याने सरकारला हा निर्णय घेणे सोपे झाले. अजूनही जागतिक बाजारपेठेत कच्च्या तेलाच्या किंमतीत घसरण सुरूच आहे.
काही दिवसांपूर्वी देशातील तेल कंपन्यांना एक लिटर पेट्रोलमागे केवळ ९.९८ रुपये इतका तर एक लिटर डिझेलमागे १.३ रुपये इतका फायदा होत होता. आता कच्च्या तेलाच्या किंमती कमी झाल्याने त्यांचा नफा प्रत्येकी ११.४८ रुपये पेट्रोलमागे तर २.९२ रुपये एक लिटर डिझेलमागे इतका झाला आहे. त्यांना केरोसीन आणि घरगुती सिलेंडरमागे प्रत्येकी १७.२६ रुपये आणि १४८.३८ रुपये इतके नुकसान सहन करावे लागत आहे. या सर्व घडामोडींकडे सरकारचे सतत लक्ष आहे. कच्च्या तेलाच्या किंमती आणखी कमी झाल्या तर देशांतर्गत पेट्रोल, डिझेल आणि अन्य इंधनांचे भाव कमी करण्याचाही सरकारचा प्रयत्न राहणार असल्याचे चिदम्बरम म्हणाले.