पुण्यातील व्यावसायिक सुरेश अलूरकर यांची हत्या

पुणे, दि. १४ : येथील अलूरकर म्युझिक कंपनीचे मालक सुरेश अलूरकर यांची त्यांच्या घरी निर्घृण हत्या करण्यात आल्यामुळे पुण्यात खळबळ उडाली आहे. दुपारी घराचा दरवाजा अर्धा उघडा असल्यामुळे शेजाऱ्यांनी आत जाऊन पाहिले तेव्हा अलूरकरांचा मृतदेह रक्ताच्या थारोळयात पडलेला आढळला.
कर्वे रोडवरील स्वप्ननगरी सोसायटीमध्ये सुरेश अलूरकर एकटेच राहत होते. या सोसायटीच्या समोरच त्यांचे दुकान होते. पण आज सकाळपासून त्यांचे दुकान बंद होते आणि ते घराबाहेरही आले नाहीत म्हणून शेजारी त्यांची विचारपूस करण्यासाठी घरी गेले. घरात अलूरकर यांचा मृतदेह रक्ताच्या थारोळयात पडले होते आणि त्यांचे हातपाय वायरने बांधले होते. तात्काळ शेजाऱ्यांनी याबाबत पोलिसांना कळवले. याप्रकरणी पोलिसांचा तपास सुरु असून खून केव्हा व कसा झाला याबाबत अजून काहीच स्पष्ट झाले नाही.