न्यायालयातून पळालेल्या आरोपीला अटक

पणजी, दि. २१ (प्रतिनिधी): पोलिसांच्या हातावर तुरी देऊन उच्च न्यायालयातून धूम ठोकलेल्या वयस्क आरोपीला आज पणजी पोलिसांनी पणजीतील एका खाजगी इस्पितळातून ताब्यात घेतले. भा.दं.स ४२० कलमाखाली शिक्षा भोगणाऱ्या ज्युलीयो आरावझो यांनी दि. १७ एप्रिल रोजी न्यायालयातून पळ काढला होता. यावेळी सडा तुरुंगाच्या पोलिसांनी पणजी पोलिस स्थानकात तक्रार दाखल केली होती.
आज सकाळी सदर आरोपी पणजीतील एका इस्पितळात उपचार घेत असल्याची माहिती पोलिसांना लागल्यावर त्याला ताब्यात घेण्यात आले. धनादेश वठला नसल्याने त्याला यापूर्वी अटक करण्यात आली होती. या प्रकरणात तो वास्को सडा तुरुंगात शिक्षा भोगत होता. गेल्या १७ एप्रिल रोजी न्यायालयात सुनावणीच्यावेळी हजर करण्यासाठी त्याला आणण्यात आले होते.
सध्या हा फरारी आरोपी पणजी पोलिसांच्या ताब्यात आहे. याविषयीचा अधिक तपास उपनिरीक्षक अर्जुन कोंडूसकर करीत आहे.