मडगावात शोरूम फोडून ७० मोबाईल संच चोरले

मडगाव, दि. २४ (प्रतिनिधी): मालभाट येथे पेरीना रेस्टॉरंटजवळील इमारतीत असलेल्या "ग्लोबल मोबाईल'चा शोरूम काल रात्री फोडून चार लाख रुपयांचे ७० मोबाईल चोरून नेल्याची तक्रार सर्वेश हेगडे यांनी मडगाव पोलिस स्थानकात नोंदवली आहे.
गजबजलेल्या आके-मडगाव रस्त्यावर असलेल्या या इमारतीत हे मोबाईल विक्रीचे दुकान असून तेथे सुरक्षा रक्षकही आहे. तो असतानाही शटर वाकवून चोरटे आत कसे गेले याबद्दल शंका व्यक्त करण्यात येत आहे. या दुकानात मोबाईल व कार्ड असून चोरट्यांनी विविध कंपन्यांचे ७० मोबाईल चोरून नेल्याचे पोलिसांनी सांगितले. मडगाव पोलिसांनी पंचनामा करून तपास सुरू केला. काही महिन्यांपूर्वी हरीमंदिर, हॉस्पिसियोजवळ, गॅलिनो हॉटेलानजीक असलेली मोबाईलची दुकाने फोडून लाखो रुपयांचा माल चोरीस गेला होता.